തിരുവനന്തപുരത്ത് ഡോക്ടർ ആത്മഹത്യ ചെയ്ത നിലയിൽ

തിരുവനന്തപുരത്ത് ഡോക്ടർ ആത്മഹത്യ ചെയ്ത നിലയിൽ. സ്വകാര്യ ആശുപത്രിയിലെ പാത്തോളജി അസോസിയേറ്റ് പ്രൊഫസർ ഡോ. സോണിയ (39) ആണ് വീട്ടിൽ തൂങ്ങി മരിച്ച നിലയിൽ കണ്ടെത്തിയത്. കഴക്കൂട്ടം വെട്ടുറോഡ് കരിയിൽ വൃന്ദാവൻ വീട്ടിൽ ഇന്നലെയാണ് ജനലിൽ ഷാളിൽ തൂങ്ങി മരിച്ചത്.മകൾ മുറി തുറക്കാത്തതിനാൽ മാതാപിതാക്കൾ കഴക്കൂട്ടം പൊലീസിൽ വിവരമറിയിച്ചു. പൊലീസെത്തി വാതിൽ തുറക്കാൻ ശ്രമിച്ചെങ്കിലും സാധിച്ചില്ല. തുടർന്ന് അഗ്നിശമനസേനയെ വിവരമറിയിച്ചു. കഴക്കൂട്ടത്തു നിന്നെത്തിയ അഗ്നിശമനസേനയാണ് വാതിൽ തുറന്ന് അകത്തു കയറിയത്. മുറിയിലെ ജനലിൽ ഷാളിൽ തൂങ്ങിയ നിലയിൽ കണ്ട സോണിയയെ ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കഴക്കൂട്ടം പൊലീസ് അസ്വാഭാവിക മരണത്തിന് കേസെടുത്തു .(ഓർക്കുക-ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. ഹെൽപ്‌ലൈൻ നമ്പർ: 1056)