നായയെ ഓടിക്കുന്നതിനിടെ ഹോട്ടൽ കെട്ടിടത്തിന്റെ മൂന്നാംനിലയിൽനിന്ന് വീണ് യുവാവിന് ദാരുണാന്ത്യം. ഹൈദരാബാദിലെ പോളിടെക്നിക് വിദ്യാർഥിയായ ഉദയ്കുമാർ(24) ആണ് മരിച്ചത്. ഹൈദരാബാദ് ചന്ദനഗർ വി.വി. പ്രൈഡ് ഹോട്ടലിൽ ഞായറാഴ്ച രാത്രിയായിരുന്നു സംഭവം. അപകടത്തിന്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.
സുഹൃത്തിന്റെ ജന്മദിനാഘോഷത്തിൽ പങ്കെടുക്കാനായാണ് ഉദയ്കുമാർ ഹോട്ടലിലെത്തിയത്. മുറിക്ക് പുറത്തിറങ്ങിയ യുവാവ് ഇടനാഴിയിൽ ഒരു നായയെ കണ്ടതോടെ ഇതിനെ ഓടിക്കാൻ ശ്രമിച്ചു. നായയുടെ പിന്നാലെ ഓടിയ യുവാവ് നായ വലത്തോട്ട് തിരിഞ്ഞതോടെ അതേഭാഗത്തേക്ക് തിരിയാൻ ശ്രമിച്ചെങ്കിലും ഓടുന്നതിനിടെ കാൽതെന്നി തുറന്നുകിടന്ന ജനലിലൂടെ താഴേക്ക് വീഴുകയായിരുന്നു.
കെട്ടിടത്തിന്റെ മൂന്നാംനിലയിൽനിന്ന് താഴേക്ക് വീണ യുവാവ് തൽക്ഷണം മരിച്ചെന്നാണ് പോലീസ് അറിയിച്ചത്. ഗാന്ധി ആശുപത്രിയിൽ പോസ്റ്റ്മോർട്ടം നടത്തിയശേഷം മൃതദേഹം ബന്ധുക്കൾക്ക് വിട്ടുകൊടുത്തു. സംഭവത്തിൽ പോലീസ് കേസെടുത്തിട്ടുണ്ട്.
