ചമ്മന്നൂർ അമൽ ഇംഗ്ലീഷ് സ്കൂളിൽ കേരളപ്പിറവി ദിനം സമുചിതമായി ആഘോഷിച്ചു.

ചമ്മന്നൂർ:കേരളത്തിന്റെ ഭാഷാ-സാംസ്കാരിക പാരമ്പര്യത്തിന് ആദരവുമർപ്പിച്ച് ചമ്മന്നൂർ അമൽ ഇംഗ്ലീഷ് സ്കൂളിൽ കേരളപ്പിറവി ദിനം സമുചിതമായി ആഘോഷിച്ചു. വിദ്യാർത്ഥികളിൽ കേരളീയ പൈതൃകത്തെക്കുറിച്ചുള്ള അവബോധം വളർത്തുന്നതിനായി സ്കൂളിൽ പ്രത്യേക ഓപ്പൺ അസംബ്ലിയും വിവിധ പരിപാടികളും സംഘടിപ്പിച്ചു.റൈഫ റൂമിയുടെ അവതരണത്തോടെ തുടങ്ങിയ ചടങ്ങിൽ ഹാദി പ്രാർത്ഥന നിർവഹിച്ചു. അമ്രീനും നൈഹയും ചേർന്ന് പ്രാർത്ഥനയുടെ വിവർത്തനം അവതരിപ്പിച്ചു. അസ്വ ചിന്താവിഷയം അവതരിപ്പിച്ചപ്പോൾ, ഫൈഹ റഫീഖ് വിദ്യാർത്ഥികൾക്ക് പ്രതിജ്ഞ ചൊല്ലിക്കൊടുത്തു. ആയിഷ ലിയ ഇ. എ. പൊതുവിജ്ഞാന വിഭാഗവും, റൈഫ റഫീഖ് കേരളപ്പിറവി സന്ദേശം നൽകിക്കൊണ്ട് പ്രസംഗവും നിർവഹിച്ചു.കുട്ടികളുടെ കലാവാസനകൾ പ്രകടമാക്കിയ വിവിധ പരിപാടികൾ ചടങ്ങിന് മാറ്റുകൂട്ടി.യുകെജി വിദ്യാർത്ഥിയായ മുഹമ്മദ് അയ്സാൻ ഫാൻസി ഡ്രസ് മത്സരത്തിൽ പങ്കെടുത്തു ശ്രദ്ധനേടി. സിയ റഹീം കവിതാപാരായണവും, അമൻ കഥപറച്ചിലും സദസ്സിനു മുന്നിൽ അവതരിപ്പിച്ചു. ആറാം ക്ലാസിലെ ഐറയും സംഘവും അവതരിപ്പിച്ച നാടൻപാട്ടും, തുടർന്ന് എൽ.പി. വിഭാഗം വിദ്യാർത്ഥികൾ അവതരിപ്പിച്ച നാടൻപാട്ടും കാണികളിൽ ആവേശം ജനിപ്പിച്ചു.സ്കൂൾ പ്രിൻസിപ്പൽ അബ്ദുൽ ഗഫൂർ നാലകത്ത് ചടങ്ങിന് ആശംസകൾ നേർന്നു സംസാരിച്ചു. പരിപാടിയിൽ സജീവമായി പങ്കെടുത്ത വിദ്യാർത്ഥികളുടെ കഴിവുകളെ അദ്ദേഹം പ്രത്യേകമായി അഭിനന്ദിച്ചു.നമ്മുടെ ഭാഷയും സംസ്കാരവും പുതിയ തലമുറയിലേക്ക് പകർന്നുനൽകേണ്ടത് അത്യന്താപേക്ഷിതമാണ്. നമ്മുടെ വേരുകളെയും പാരമ്പര്യത്തെയും സ്നേഹിച്ചുകൊണ്ട് മാത്രമേ മികച്ചൊരു ഭാവി സമൂഹം വാർത്തെടുക്കാൻ സാധിക്കൂ. കുട്ടികളിൽ ഈ മൂല്യങ്ങൾ വളർത്തിയെടുക്കുന്ന ഇത്തരം ആഘോഷങ്ങൾ മാതൃകാപരമാണെന്ന് സ്കൂൾ ചെയർമാൻ അലി പഷ്ണത്തയിൽ അഭിപ്രായപ്പെട്ടു.പരിപാടിയുടെ കോർഡിനേറ്റർമാരായ സിമി ടീച്ചറും ബെറ്റി ടീച്ചറും ആഘോഷങ്ങളുടെ സുഗമമായ നടത്തിപ്പിന് നേതൃത്വം നൽകി.അധ്യാപകരുടെയും വിദ്യാർത്ഥികളുടെയും കൂട്ടായ്മയിൽ കേരളപ്പിറവി ആഘോഷം പൂർണ്ണ വിജയമായി മാറി.