കല്യാണത്തിന് കീർത്തി ഉടുത്തത് 405 മണിക്കൂര്‍ കൊണ്ട് നെയ്‌തെടുത്ത പ്രണയകവിത തുന്നിചേര്‍ത്ത വിവാഹസാരി

തെന്നിന്ത്യൻ സൂപ്പർ നായിക കീർത്തി സുരേഷും ദീർഘകാല സുഹൃത്തായ ആന്റണി തട്ടിലും കഴിഞ്ഞ ദിവസമാണ് വിവാഹിതരായത്. പിന്നാലെ ഇരുവരുടേയും വിവാഹ ചിത്രങ്ങളും വൈറലായി. കീർത്തിയുടെ പരമ്പരാ​ഗത ശൈലിയിലുള്ള സാരിക്കും അഭിനന്ദന പ്രവാഹമായിരുന്നു. പ്രശസ്ത ഡിസൈനർ അനിത ഡോംഗ്രെയാണ് കീർത്തി വിവാഹത്തിന് ധരിച്ച കാഞ്ചീവരം സാരി ഡിസൈൻ ചെയ്തത്. മഞ്ഞയും പച്ചയും ചേർന്ന കാഞ്ചിപുരം സാരി വൈര ഊസി എന്ന പരമ്പരാഗത രീതിയിലൂടെയാണ് നെയ്തെടുത്തിരിക്കുന്നത്. ഒമ്പത് മുഴം നീളമുള്ള സാരിയിൽ ഗോൾഡ് സരി വർക്കുമുണ്ട്. കീർത്തി തന്നെയെഴുതിയ പ്രണയകവിതയും സാരിയിൽ തുന്നിചേർത്തിട്ടുണ്ട്. പ്രശാന്ത് ദയാനന്ദ്, യോഗാനന്ദം, കന്തവേൽ. സുഭാഷ്, ശേഖർ, ശിവകുമാർ, കണ്ണിയപ്പൻ, കുമാർ എന്നീ നെയ്ത്ത് കലാകാരൻമാരാണ് ഈ സാരി നെയ്തെടുത്തത്. 405 മണിക്കൂറുകളെടുത്താണ് സാരി നെയ്തത്.പരമ്പരാ​ഗത രീതിയിൽ വധുവായി അണിഞ്ഞൊരുങ്ങിയാണ് കീർത്തി ചടങ്ങിനെത്തിയത്. മഞ്ഞയിൽ പച്ചബോർഡറുള്ള പട്ടുപുടവയും ജിമിക്കി കമ്മലും ട്രഡീഷണൽ ടച്ചുള്ള ആഭരണങ്ങളും നെറ്റിച്ചുട്ടിയുമൊക്കെ കീർത്തിക്ക് തമിഴ് വധു സ്റ്റൈൽ നൽകി.എഞ്ചിനീയറായ ആന്റണി ഇപ്പോൾ മുഴുവൻ സമയ ബിസിനസ്സുകാരനാണ്. കേരളം ആസ്ഥാനമായുള്ള ആസ്പെറോസ് വിൻഡോസ് സൊല്യൂഷൻ ബിസിനസ്സിന്റെ ഉടമ കൂടിയാണ്ഗോവയിൽ വെച്ച് നടന്ന സ്വകാര്യ വിവാഹ ചടങ്ങിൽ തെന്നിന്ത്യൻ സൂപ്പർതാരങ്ങളും എത്തിയിരുന്നു. വിജയ്, നാനി, തൃഷ തുടങ്ങി നിരവധി പേർ ചടങ്ങിലെത്തി.’റിവോൾവർ റിത’യടക്കം തമിഴിൽ രണ്ട് സിനിമകളാണ് കീർത്തി ഇപ്പോൾ ചെയ്തുകൊണ്ടിരിക്കുന്നത്. തമിഴ് ചിത്രം തെരിയുടെ ബോളിവുഡ് റീമേക്കായ ബേബി ജോണാണ് കീർത്തിയുടെ പുതിയ ചിത്രം. വരുൺ ധവാനാണ് ടൈറ്റിൽ റോളിലെത്തുന്നത്.ഡിസംബർ 25 ന് ചിത്രം റിലീസ് ചെയ്യും