എംഎൽഎ വിളിച്ചു ചേർത്ത യോഗത്തിൽ അംഗീകൃത രാഷ്ട്രീയ പാർട്ടിക്കാരെ ഒഴിവാക്കിയില്‍ ദുരൂഹതയെന്ന് കോണ്‍ഗ്രസ്സ്

പൊന്നാനി:കൊല്ലൻ പടി ഭാഗത്തേക്ക് ബസ് സർവീസ് നിർത്തി വെച്ചതിൽ കോൺഗ്രസ് നടത്തിയ പ്രതിഷേധത്തെ തുടർന്ന് എംഎൽഎ വിളിച്ചു ചേർത്ത യോഗത്തിൽ അംഗീകൃത രാഷ്ട്രീയ പാർട്ടിക്കാരെ ഒഴിവാക്കി സ്വന്തം പാർട്ടിക്കാരും, മോട്ടോർ വാഹന വകുപ്പ് ഉദ്യോഗസ്ഥരും,ബസ്സുടമകളും രഹസ്യ യോഗം ചേർന്ന് എടുത്ത തീരുമാനങ്ങളിൽ ദുരൂഹതയുണ്ടെന്ന് ബ്ലോക്ക് കോൺഗ്രസ് കമ്മിറ്റി യോഗം കുറ്റപ്പെടുത്തി.ദേശീയപാതയുടെയും,പൊന്നാനിയിലെ മറ്റ് വികസന കാര്യങ്ങളിലും എംഎൽഎ സ്വന്തം പാർട്ടിക്കാരെയും ഉദ്യോഗസ്ഥരെയും മാത്രം വിളിച്ചുചേർത്ത് രഹസ്യ യോഗങ്ങൾ നടത്തിവരുന്നത് മറ്റു രാഷ്ട്രീയ പാർട്ടിക്കാരുടെ അഭിപ്രായത്തെ ഭയപ്പെടുന്നത് കൊണ്ടാണെന്ന് കോൺഗ്രസ് ആരോപിച്ചു.ബസ്സുടമകളുമായി എംഎൽഎ നടത്തിയ രഹസ്യ ചർച്ച കാരണം കണ്ണൻ തൃക്കാവ്, ഉറൂബ് നഗർ പ്രദേശങ്ങളിലെ ജനങ്ങൾക്ക് വാഹന സൗകര്യം ഇല്ലാത്തത് വളരെയധികം പ്രയാസങ്ങളാണ് ഉണ്ടാക്കിയിട്ടുള്ളത്.സ്വന്തമായി തീരുമാനങ്ങൾ എടുക്കുവാൻ കഴിവില്ലാത്ത എംഎൽഎ പാർട്ടിക്കാരുടെ തീരുമാനങ്ങൾ മാത്രം നടപ്പിലാക്കി പൊന്നാനിയുടെ വികസന പ്രവർത്തനങ്ങൾ മുരടിപ്പിക്കുകയാണെന്നും പൊന്നാനി ബ്ലോക്ക് കോൺഗ്രസ് കമ്മിറ്റി യോഗം കുറ്റപ്പെടുത്തി. ബ്ലോക്ക് കോൺഗ്രസ് പ്രസിഡണ്ട് മുസ്തഫ വടമുക്ക് അധ്യക്ഷത വഹിച്ചു. യുഡിഎഫ് ജില്ലാ ചെയർമാൻ പിടി അജയ്മോഹൻ ഉദ്ഘാടനം ചെയ്തു.കെപിസിസി നിർവാഹക സമിതി അംഗം വി സെയ്ദ് മുഹമ്മദ് തങ്ങൾ, ടി കെ അഷറഫ്,വി ചന്ദ്രവല്ലി, പുന്നക്കൽ സുരേഷ്, കെ പി ജബ്ബാർ, ജെ പി വേലായുധൻ, എ പവിത്രകുമാർ,ഉണ്ണികൃഷ്ണൻ പൊന്നാനി, യൂ മാമുട്ടി, എ കെ അലി, സിഎ ശിവകുമാർ, കെ ജയപ്രകാശ്, എൻ പി നബിൽ, നൂറുദ്ദീൻ, എന്നിവർ പങ്കെടുത്തു സംസാരിച്ചു.