പൊന്നാനി:കാപ്പ നിയമം ലംഘിച്ച ക്രിമിനല് കേസ് പ്രതി അറസ്റ്റില്.പൊന്നാനി വലിയ ജാറത്തിന് സമീപം താമസിക്കുന്ന ഹാജിയാരകത്ത് വീട്ടിൽ മുഹമ്മദ് ജസീൽ(19) എന്നയാളെയാണ് പൊന്നാനി പോലീസ് സ്റ്റേഷൻ ഹൗസ് ഓഫീസർ എംവി ജിഷ്ണുവിന്റെ നേതൃത്വത്തിലുള്ള അന്വേഷണസംഘം അറസ്റ്റ് ചെയ്തത്.മലപ്പുറം ജില്ലയിലെ പൊന്നാനി,ചങ്ങരംകുളം, കുറ്റിപ്പുറം പോലീസ് സ്റ്റേഷൻ പരിധികളിലായി നിരവധി ക്രിമിനൽ കേസുകളിൽ പ്രതിയാണ് ജസീൽ.മോഷ്ടിച്ച ആഡംബര ബൈക്കിൽ അഭ്യാസപ്രകടനം നടത്തുന്നതിനിടെ പള്ളപ്രത്ത് ഹൈവേയിൽ ബൈക്കുകൾ കൂട്ടിയിടിച്ച് രണ്ടുപേർ തൽക്ഷണം മരിച്ച സംഭവത്തിലും ഇയാൾ പ്രതിയാണ്.ലഹരി ഉപയോഗിച്ച് വാക്കേറ്റമുണ്ടാക്കുന്നത് തടയാൻ ശ്രമിച്ച പൊന്നാനി പോലീസ് സ്റ്റേഷനിലെ ഉദ്യോഗസ്ഥനെ മർദിക്കുകയും മൊബൈൽ ഫോൺ തട്ടിയെടുക്കുകയും ചെയ്ത കേസിൽ പ്രായപൂർത്തിയാകുന്നതിന് മുമ്പുതന്നെ ഇയാൾ പ്രതിയായിരുന്നു.കുറ്റകരമായ നരഹത്യാശ്രമം,ഗുരുതരമായ ദേഹോപദ്രവം ഏൽപ്പിക്കൽ,മോഷണം തുടങ്ങിയ എട്ടോളം ക്രിമിനൽ കേസുകളിൽ പ്രതിയായ ഇയാളുടെ തുടർച്ചയായ കുറ്റകൃത്യങ്ങൾ കണക്കിലെടുത്താണ് കാപ്പ നിയമപ്രകാരം ആറുമാസത്തേക്ക് നിയന്ത്രണങ്ങൾ ഏർപ്പെടുത്തിയിരുന്നത്.കാപ്പ നിയമത്തിലെ വ്യവസ്ഥകൾ ലംഘിച്ചതിനെ തുടർന്നാണ് പോലീസ് നടപടി സ്വീകരിച്ചത്. അറസ്റ്റ് ചെയ്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു.







