പന്ത് കൈവശം വെക്കുന്നതിലും ഷോട്ടുകള്‍ ഉതിര്‍ക്കുന്നതിലും ആധിപത്യം പുലര്‍ത്തിയിട്ടും സ്‌കോര്‍ബോര്‍ഡില്‍ അനുകൂലമായ മാറ്റമുണ്ടാക്കാന്‍ സാധിക്കാതെ അര്‍ജന്റീനക്ക് നിരാശ. അന്താരാഷ്ട്ര സൗഹൃദ മത്സരങ്ങളുടെ ഭാഗമായി നടന്ന മത്സരം അവസാനിച്ചപ്പോള്‍ 2-1 സ്‌കോറില്‍ അര്‍ജന്റീന പരാജയപ്പെടുകയായിരുന്നു. 21 വര്‍ഷത്തിനിടെ മെസ്സിയില്ലാതെ കളിച്ച ആദ്യ മത്സരം അര്‍ജന്റീനയെ സംബന്ധിച്ചിടത്തോളം നിരാശാജനകമായിരുന്നു.
48-ാം മിനിറ്റില്‍ അര്‍ജന്റീനിയന്‍ ഡിഫന്റര്‍ ബലേര്‍ഡി പന്ത് ക്ലിയര്‍ ചെയ്യാന്‍ ശ്രമിക്കുന്നത് സെല്‍ഫ് ഗോളില്‍ കലാശിക്കുകയായിരുന്നു. പിന്നാലെ 53-ാം മിനിറ്റില്‍ ഒരു കോര്‍ണര്‍ കിക്കില്‍ നിന്ന് ലഭിച്ച അവസരം മുതലാക്കി മാക്‌സി അരാവുജോ ഉറുഗ്വേയുടെ ലീഡ് 2-0 ത്തിലേക്ക് ഉയര്‍ത്തുകയും ചെയ്തു. 72-ാം മിനിറ്റില്‍ അല്‍വാരസ് ഒരു ഗോള്‍ തിരിച്ചടിച്ചെങ്കിലും സമനില പിടിക്കാന്‍ പോലും കഴിയാത്ത തരത്തില്‍ അര്‍ജന്റീനയെ പ്രതിരോധിക്കുകയായിരുന്നു ഉറുഗ്വായ്.
