മൗണ്ട് മൗൻഗനൂയ്: പരമ്പരയിലെ നാലാം ഏകദിനത്തിൽ ന്യൂസീലൻഡിനെതിരേ ഇന്ത്യയ്ക്ക് നാണംകെട്ട തോൽവി. കിവീസ് ഉയർത്തിയ 334 റൺസെന്ന കൂറ്റൻ വിജയലക്ഷ്യം പിന്തുടർന്ന് ബാറ്റിങ്ങിനിറങ്ങിയ ഇന്ത്യ 26.4 ഓവറിൽ വെറും 89 റൺസിന് ഓൾഔട്ടായി. നേരിട്ടത് 244 റൺസിന്റെ വമ്പൻ തോൽവി. ഒരു മത്സരം ശേഷിക്കേ പരമ്പരയിൽ 2-1ന് ഇന്ത്യ മുന്നിലാണ്.
9.4 ഓവറിൽ വെറും 27 റൺസിന് ആറു വിക്കറ്റ് പിഴുത മാറ്റ് ഹെൻറിയാണ് ഇന്ത്യയെ തകർത്തത്. ഇന്നിങ്‌സിന്റെ ആദ്യ ഓവറിൽ തന്നെ രോഹിത് ശർമ (0), വിരാട് കോലി (0), ക്യാപ്റ്റൻ ശ്രേയസ് അയ്യർ (0) എന്നിവരെ പുറത്താക്കി ഹെൻറി ഇന്ത്യയെ ഞെട്ടിച്ചിരുന്നു. ആ തകർച്ചയിൽ നിന്ന് പിന്നീട് കരകയറാൻ ടീമിനായില്ല.
53 പന്തിൽ നിന്ന് 27 റൺസെടുത്ത ഇഷാൻ കിഷനാണ് ഇന്ത്യയുടെ ടോപ് സ്‌കോറർ. അക്ഷർ പട്ടേൽ (21), നമൻ ധീർ (21) എന്നിവർ മാത്രമാണ് ഇഷാനെ കൂടാതെ ഇന്ത്യൻ നിരയിൽ രണ്ടക്കം കടന്നവർ. ഋതുരാജ് ഗെയ്ക്‌വാദ് അഞ്ചു റൺസെടുത്ത് പുറത്തായി. കിവീസിനായി മാത്യു ഫിഷർ മൂന്നു വിക്കറ്റ് വീഴ്ത്തി.
നേരത്തേ നിശ്ചിത അമ്പത് ഓവറിൽ കിവീസ് 333 റൺസാണെടുത്തത്. വിൽ യങ്ങിന്റെ സെഞ്ചുറിയും ടിം സെയ്ഫേർട്ടിന്റെ അർധസെഞ്ചുറിയുമാണ് കിവീസിന് കരുത്തായത്. യങ് 108 പന്തിൽ 125 റൺസെടുത്തു.
ടോസ് നഷ്ടപ്പെട്ട് ബാറ്റിങ്ങിനിറങ്ങിയ ന്യൂസിലൻഡിന്റേത് മികച്ച തുടക്കമായിരുന്നു. വിൽ യങ്ങും ടിം സെയ്ഫേർട്ടും ശ്രദ്ധയോടെ ഇന്നിങ്സ് മുന്നോട്ടുകൊണ്ടുപോയി. രണ്ടാം ഓവറിൽ രണ്ട് തവണ ഇന്ത്യ യങ്ങിന്റെ ക്യാച്ച് വിട്ടുകളഞ്ഞു. രോഹിത്തും ഇഷാൻ കിഷനുമാണ് ക്യാച്ച് വിട്ടത്. ഔട്ടിൽ നിന്ന് രക്ഷപ്പെട്ട വിൽ യങ് പിന്നീട് ഇന്ത്യൻ ബൗളർമാരെ കണക്കിന് പ്രഹരിക്കുന്നതാണ് മൈതാനത്ത് കണ്ടത്. പവർപ്ലേയിൽ ടിം സെയ്ഫേർട്ടായിരുന്നു വേഗത്തിൽ റൺസ് കണ്ടെത്തിയിരുന്നത്. യങ്ങിനെ ഒരുവശത്തുനിർത്തി സെയ്ഫേർട്ട് അടിച്ചുകളിച്ചു. എട്ടോവറിൽ അമ്പതിലെത്തിയ കിവീസ് പത്തോവറിൽ 72 റൺസെടുത്തു. ആ ഘട്ടത്തിൽ 51 റൺസും യങ്ങിന്റെ ബാറ്റിൽ നിന്നാണ് പിറന്നത്.
എന്നാൽ ഫിഫ്റ്റി തികച്ചതിന് പിന്നാലെ സെയ്ഫേർട്ട് പുറത്തായി. 48 പന്തിൽ നിന്ന് 58 റൺസാണ് താരത്തിന്റെ സമ്പാദ്യം. ആദ്യവിക്കറ്റിൽ 85 റൺസിന്റെ കൂട്ടുകെട്ടാണ് ഇരുവരും പടുത്തുയർത്തിയത്. സെയ്ഫേർട്ട് പുറത്തായതോടെ യങ് ആ ദൗത്യം ഏറ്റെടുത്തു. താരം റൺറേറ്റ് കുറയാതെ ഇന്നിങ്സ് കെട്ടിപ്പടുത്തു. പുതുമുഖ താരങ്ങളായ നിക്ക് കെല്ലി(4), ഡീൻ ഫോക്സ്‌ക്രോഫ്റ്റ്(8) എന്നിവർ നിരാശപ്പെടുത്തി. അതോടെ കിവീസ് 125-3 എന്ന നിലയിലായി.
നാലാം വിക്കറ്റിൽ ഫിൻ അലനുമായി ചേർന്ന് യങ് ഉഗ്രൻ കൂട്ടുകെട്ടുണ്ടാക്കി. അതോടെ കിവീസ് ട്രാക്കിലായി. വിൽ യങ് പതിയെ സ്‌കോറുയർത്തിയപ്പോൾ അലൻ വെടിക്കെട്ട് നടത്തി. കുൽദീപ് യാദവ് എറിഞ്ഞ 26-ാം ഓവറിൽ 19 റൺസാണ് ഇരുവരും ചേർന്ന് അടിച്ചെടുത്തത്. 29-ാം ഓവറിൽ സ്‌കോർ 200 കടന്നു. പിന്നാലെ അലൻ മടങ്ങി. 30 പന്തിൽ നിന്ന് 41 റൺസാണ് താരത്തിന്റെ സമ്പാദ്യം. 32-ാം ഓവറിൽ യങ് സെഞ്ചുറിയും പൂർത്തിയാക്കി. 125 റൺസെടുത്ത യങ്ങിനെ നമാൻ ധിർ പുറത്താക്കിയതോടെ കിവീസ് പ്രതിരോധത്തിലായി. പിന്നാലെ ബ്രേസ്വെല്ലും(15) മടങ്ങി. അതോടെ കിവീസ് 258-6 എന്ന നിലയിലായി.
മിച്ചൽ സാന്റ്നർ, ക്രിസ്റ്റ്യൻ ക്ലർക്ക്, കൈൽ ജാമിസൺ എന്നിവരും സ്‌കോർ ബോർഡിലേക്ക് സംഭാവന നൽകിയതോടെ ടീം 300 കടന്നു. സാന്റ്നറും ക്ലർക്കും 35 റൺസ് കൂട്ടുകെട്ട് പടുത്തുയർത്തി. സാന്റ്നർ 24 റൺസും ക്ലർക്ക് 22 റൺസുമെടുത്ത് പുറത്തായി. ജാമിസൺ 19 റൺസെടുത്തു. ഒടുക്കം 333 റൺസിന് കിവീസ് ഓൾഔട്ടായി. ഇന്ത്യക്കായി ആഖ്വിബ് നബി, ഗുർനൂർ ബ്രാർ, അക്സർ പട്ടേൽ എന്നിവർ രണ്ട് വീതം വിക്കറ്റെടുത്തു.
