ചങ്ങരംകുളം:ഷാർജ അന്താരാഷ്ട്ര പുസ്തകമേളയിൽ കവിതാസമാഹാരം പ്രകാശനത്തിന് തെരെഞ്ഞെടുക്കപ്പെട്ടതിന്റെ അഭിമാനത്തിൽ പന്താവൂർ ഇർശാദ് ഇംഗ്ലീഷ് സ്കൂളിലെ പത്താം ക്ലാസ് വിദ്യാർത്ഥിനി ആയിഷ ഹന്ന എ എസ്
ന്യൂനപക്ഷ വിദ്യാലയങ്ങളുടെ കൂട്ടായ്മയായ ഐ എ എം ഇ ആഭിമുഖ്യത്തിൽ കേരളത്തിലും ഇതര സംസ്ഥാനങ്ങളിലുമായി അറുന്നൂറിലേറെ സ്കൂളുകളിൽ നിന്നും ക്ഷണിച്ച വിദ്യാർത്ഥികളുടെ രചനകളിൽ നിന്നാണ് വിദഗ്ധ ജൂറി , എട്ട് പുസ്തകങ്ങളിലൊന്നായി ആയിഷ ഹന്നയുടെ കവിതാസമാഹാരം തെരഞ്ഞെടുത്തത്.
മലപ്പുറം ജില്ലയിൽ വട്ടംകുളം പഞ്ചായത്തിലെ നീലിയാട് സ്വദേശിയായ ആളത്ത് ശറഫുദ്ധീന്റെയും മുനീറയുടെയും മകളാണ് ആയിഷ ഹന്ന .
എൽ കെ ജി. മുതൽ ഇർശാദ് ഇംഗ്ലീഷ് സ്കൂളിലെ വിദ്യാർത്ഥിനിയാണ്. ആമിന ഫിദ, ഫാത്തിമ മിന്ന, ഖദീജ നദ, മുഹമ്മദ് അർഷാദ് എന്നിവരാണ് സഹോദരങ്ങൾ
ചെറുപ്പം മുതലേ കവിതകളോടുള്ള അഗാധ
മായ താൽപര്യവും സർഗാത്മകമായ ചിന്തകളും ആയിഷയെ കവിതാരചനയുടെ ലോകത്തേക്ക് നയി ക്കുയായിരുന്നു.
ഒരു കൗമാര വിദ്യാർഥിനിയുടെ മനസ്സിൽ വിരിഞ്ഞ കവിതകൾ അന്താരാഷ്ട്ര പുസ്തകമേളയുടെ വേദിയിലെത്തുന്നത് ഇർശാദ് ഇംഗ്ലീഷ് സ്കൂളിനും അഭിമാനനിമിഷമാണ്. പഠനത്തോടൊപ്പം സർഗാത്മകതയ്ക്കും സാഹിത്യത്തിനും നൽകുന്ന പ്രോത്സാഹനത്തിന്റെ മനോഹരമായ ഉദാഹരണം കൂടിയാണ് ആയിഷ ഹന്നയുടെ ഈ നേട്ടം.
വായനക്കാരുടെ മനസ്സിൽ തന്റെ വരികൾ ഒരു ചെറിയ വെളിച്ചമെങ്കിലും പകരുമെന്ന പ്രതീക്ഷയോടെയാണ് ആയിഷ ഹന്ന തന്റെ ആദ്യ കവിതാസമാഹാരവുമായി വായനക്കാരിലേക്കെത്തുന്നത.
പഠനത്തിനിടയിൽ മനസ്സിലും നോട്ടുപുസ്തകങ്ങളിലും കുറിച്ചുവെച്ച ചിന്തകളും അനുഭവങ്ങളും പിന്നീട് ഒഴിവുസമയങ്ങളിൽ കവിതകളായി രൂപപ്പെടുകയായിരുന്നു.
സ്കൂൾതലത്തിലും വിവിധ സാഹിത്യവേദികളിലും തന്റെ രചനകളിലൂടെ ശ്രദ്ധേയയായ ആയിഷ CBSE-IAME കലോത്സവങ്ങളിലെ സംസ്ഥാനതലത്തിൽ സ്ഥിരം വിജയിയാണ്.
മഷിപുരളാതെ, മനസ്സിന്റെ കോണുകളിൽ ഒളിഞ്ഞിരുന്ന നിരവധി കവിതകൾക്ക് പുസ്തകരൂപത്തിലൂടെ പുതുജീവൻ നൽകുകയാണ് ഈ സമാഹാരം.
ഒരു കൗമാര മനസ്സിന്റെ സ്വപ്നങ്ങളും ചിന്തകളും വികാരങ്ങളും പ്രതീക്ഷകളും അക്ഷരങ്ങളായി പിറന്നുവീഴുന്ന ഹൃദയത്താളുകളാണ് ഈ കവിതകൾ.
ഷാർജ അന്താരാഷ്ട്ര പുസ്തകമേളയിലെ പ്രധാന വേദിയായ ബാൾ ഹാളിൽ ശനിയാഴ്ച വൈകിട്ട് ആറിന് നടക്കുന്ന ഫ്യൂച്ചർ എജു . ലീഡേഴ്സ് സമ്മിറ്റിൽ പ്രമുഖരുടെ സാന്നിധ്യത്തിൽ പുസ്തകങ്ങളുടെ പ്രകാശനം നടക്കും.
ആഗോള വിദ്യാഭ്യാസ വിചക്ഷണർ, ഐക്യ രാഷ്ട്ര സഭയുടെ പശ്ചിമേഷ്യൻ രാജ്യങ്ങളുടെ ഡപ്യൂട്ടി ഡയരക്ടർ ജനറൽ പ്രൊഫ. ഗാരി ഛാൻ വാഷിംഗ്ടൺ , കേരള ആഭ്യന്തരമന്ത്രി രമേശ് ചെന്നിത്തല, യു എ.ഇയിലെ വിദ്യാഭ്യാസ സ്ഥാപനങ്ങളുടെ മേധാവികൾ, സാംസ്കാരിക പ്രമുഖർ തുടങ്ങിയവർ ചടങ്ങിൽ പങ്കെടുക്കും.
