ചങ്ങരംകുളം:മതത്തിന്റെ അതിർവരമ്പുകൾ മാഞ്ഞതോടെ മലപ്പുറം ചങ്ങരംകുളത്ത് കണ്ടത് മാനവികതയുടെ മറ്റൊരു നേർക്കാഴ്ച. കാൻസർ ബാധിച്ച് മരിച്ച 52 വയസ്സുകാരിയുടെ അന്ത്യകർമ്മങ്ങൾക്കാണ് സമീപത്തെ മസ്ജിദ് വേദിയായത്.
കുന്നംകുളം കക്കാട് സ്വദേശിനിയായ പ്രേമലതയാണ് കഴിഞ്ഞ ദിവസം കാൻസർ ബാധിച്ച് മരിച്ചത്..കഴിഞ്ഞ 18 വർഷമായി മസ്ജിദിന് സമീപത്തെ വാടകവീട്ടിൽ താമസിച്ച് വരികയായിരുന്നു പ്രേമലത.
അന്ത്യകർമ്മങ്ങൾക്ക് വീട്ടിൽ സൗകര്യമില്ലാതെ വന്നതോടെ മസ്ജിദ് ഭാരവാഹികളും നാട്ടുകാരും ചേർന്ന് മരണാനന്തര ചടങ്ങുകൾക്ക് മസ്ജിദിൽ സൗകര്യം ഒരുക്കുകയായിരുന്നു.
ചികിത്സയിലായിരുന്ന പ്രേമലത തൃശൂർ മെഡിക്കൽ കോളേജ് ആശുപത്രിയിൽ വെച്ചാണ് മരിച്ചത്. മൃതദേഹം വീട്ടിൽ കൊണ്ടുവന്ന് കിടത്താനും മറ്റു ചടങ്ങുകൾ നടത്താനും സൗകര്യമില്ലാത്തതിനാലാണ് പള്ളി ഭാരവാഹികളുടെ സഹായം തേടിയത്.ചങ്ങരംകുളം പള്ളിക്കരയിലെ ഖദീജ മസ്ജിദിലാണ് അന്ത്യകർമ്മങ്ങൾ നടന്നത്.ബന്ധുക്കളും നാട്ടുകാരും ചേർന്നാണ് ചടങ്ങുകൾ നടത്തിയത്.
ലീഡ് സഭാ സദസ്സിലെ സജീവ പ്രവർത്തകയായിരുന്നു പ്രേമലത. സുഹറ മമ്പാട്, എം.കെ. പ്രിയ, കെ.കെ. ജിജി, ടി. പുഷ്പ, കെ. സുഷമ തുടങ്ങിയവർ ചടങ്ങുകൾക്ക് നേതൃത്വം നൽകി.പള്ളിക്കമ്മിറ്റി പ്രസിഡന്റ് എ.വി. അബ്ദു, സെക്രട്ടറി എം.പി. ബഷീർ, അഷ്റഫ് കാട്ടിൽ, എം.പി. സക്കീർ, അബ്ദുൽ സത്താർ എന്നിവരും,പള്ളിക്കമ്മിറ്റിയും യുവജന വിഭാഗവും ചേർന്ന് എല്ലാ സഹായവും ചെയ്തു.
മൃതദേഹം കുളിപ്പിച്ച് ചടങ്ങുകള്‍ക്ക് ശേഷം വീട്ടില്‍ പൊതുദര്‍ശനത്തിന് വെച്ചു.പിന്നീട് പൊതുശ്മശാനത്തിൽ സംസ്കരിച്ചു.സഹദേവനാണ് പ്രേമലതയുടെ ഭര്‍ത്താവ്.നീതു മകളാണ്
