ക്ലിഫ് ഹൗസ് നവീകരണത്തിന് 1.24 കോടി രൂപ അനുവദിച്ചു

​തിരുവനന്തപുരം: മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിന്റെ അത്യാവശ്യ അറ്റകുറ്റപ്പണികൾക്കും നവീകരണത്തിനുമായി 1.24 കോടി രൂപ അനുവദിച്ചു. വസതിയിലെ പഴക്കം ചെന്ന നിർമിതികളും അടിസ്ഥാന സൗകര്യങ്ങളും നവീകരിക്കുന്നതിന്റെ ഭാഗമായാണ് തുക അനുവദിച്ചിരിക്കുന്നത്.
​നേരത്തെ വൻതോതിലുള്ള സാമ്പത്തിക ചെലവുകൾ ഒഴിവാക്കി അവശ്യ അറ്റകുറ്റപ്പണികൾ മാത്രം നടത്തിയാൽ മതിയെന്ന നിലപാടിലായിരുന്നു മുഖ്യമന്ത്രി വി. ഡി. സതീശൻ. എന്നാൽ, കെട്ടിടത്തിന്റെ നിലവിലെ അവസ്ഥ കണക്കിലെടുത്ത് നവീകരണ പ്രവർത്തനങ്ങളുമായി മുന്നോട്ടുപോകാൻ സർക്കാർ തീരുമാനിക്കുകയായിരുന്നു.
​വിവിധ മന്ത്രിമന്ദിരങ്ങളുടെ അറ്റകുറ്റപ്പണികൾക്കായി മുൻപ് തുക അനുവദിച്ചിരുന്നെങ്കിലും ക്ലിഫ് ഹൗസിനായി പ്രത്യേക തുക വകയിരുത്തിയിരുന്നില്ല. മൻമോഹൻ ബംഗ്ലാവ് (81.06 ലക്ഷം രൂപ), അജന്ത (58.74 ലക്ഷം രൂപ) തുടങ്ങിയ മന്ത്രിമന്ദിരങ്ങൾ ഉൾപ്പെടെ ഒൻപത് ഔദ്യോഗിക വസതികളുടെ സുരക്ഷയും അടിസ്ഥാന സൗകര്യങ്ങളും മെച്ചപ്പെടുത്തുന്നതിനായി നേരത്തെ 3.95 കോടിയോളം രൂപ അനുവദിച്ച് ഉത്തരവായിരുന്നു. ഇതിന്റെ തുടർച്ചയായാണ് ക്ലിഫ് ഹൗസിലും അത്യാവശ്യ നവീകരണ പ്രവർത്തനങ്ങൾ ആരംഭിക്കുന്നത്.