പത്തനംതിട്ട: ലൈംഗികപീഡനക്കേസുകളില്‍ പ്രതിയായതിനെ തുടര്‍ന്ന് പാര്‍ട്ടി നടപടി നേരിട്ട രാഹുല്‍ മാങ്കൂട്ടത്തിലിന്റെ ഇടപെടലുകളില്‍ കോണ്‍ഗ്രസില്‍ അതൃപ്തി. രാഹുലിന്റെ ഇടപെടലുകള്‍ അംഗീകരിക്കാനാവില്ലെന്നാണ് കോണ്‍ഗ്രസ് പത്തനംതിട്ട ജില്ലാ നേതൃത്വത്തിലെ പ്രബലവിഭാഗത്തിന്റെ നിലപാട്. രാഹുല്‍ മാങ്കൂട്ടത്തിലിനെ പിന്തുണച്ച ഡിസിസി പ്രസിഡന്റിനെതിരെയും വിമര്‍ശനം ഉണ്ട്. അടൂര്‍ സംഭവത്തില്‍ രാഹുലിനെതിരെ യൂത്ത് കോണ്‍ഗ്രസിലും പടയൊരുക്കമുണ്ട്.
ഏഴംകുളത്ത് ഡിവൈഎഫ്‌ഐ സംഘടിപ്പിച്ച ഡല്‍ഹി പ്രതിഷേധ പരിപാടിക്കിടെ യൂത്ത് കോണ്‍ഗ്രസ് പ്രവര്‍ത്തകര്‍ കൂവി വിളിച്ചതാണ് പ്രകോപനമായത്. തുടര്‍ന്ന് ഡിവൈഎഫ്‌ഐ – യൂത്ത് കോണ്‍ഗ്രസ് പ്രവര്‍ത്തകര്‍ ഏറ്റുമുട്ടിയതിനെതുടര്‍ന്ന് നിരവധി പേര്‍ക്ക് പരുക്കേറ്റു. ഇതിനിടെ സംഘടിച്ചെത്തിയ രാഹുല്‍ മാങ്കൂട്ടത്തിന്റെ നേതൃത്വത്തിലുള്ള സംഘം അടൂര്‍ ജനറല്‍ ആശുപത്രിയിലുള്ള എസ്എഫ്‌ഐ പ്രവര്‍ത്തകരെ മര്‍ദിക്കുകയായിരുന്നു. തുടര്‍ന്ന് സ്വകാര്യ ആശുപത്രിക്ക് മുമ്പിലും സംഘര്‍ഷമുണ്ടായി.
രാഹുലിന്റെ നേതൃത്വത്തില്‍ ആസൂത്രിതമായാണ് പ്രവര്‍ത്തകര്‍ക്ക് നേരെ ആക്രമണം നടത്തിയതെന്നാണ് സിപിഐഎം ആരോപണം. തന്റെ സഹപ്രവര്‍ത്തകരെ ആക്രമിച്ചാല്‍ ഇടപെടാതിരിക്കാനാവില്ലെന്നാണ് രാഹുല്‍ മാങ്കൂട്ടത്തില്‍ പറഞ്ഞത്.
