തിരുവനന്തപുരം:വയലിനിസ്റ്റ് ബാലഭാസ്കറിന്റെ മരണത്തിനു പിന്നിലെ യാഥാർഥ്യങ്ങൾ കണ്ടെത്തി കുറ്റവാളികൾക്കു ശിക്ഷ ഉറപ്പാക്കുന്നതുവരെ നിയമപോരാട്ടം തുടരുമെന്ന് മാതാപിതാക്കൾ. മകന്റെ മരണത്തിലെ അന്വേഷണം അട്ടിമറിക്കാൻ പ്രതികൾക്കൊപ്പം പൊലീസുകാരും കൂട്ടുനിന്നു. ഇതുസംബന്ധിച്ച തങ്ങളുടെ ആശങ്കകളും സംശയങ്ങളും ശരിയാണെന്നു ബോധ്യംവന്നതുകൊണ്ടാണ് ഹൈക്കോടതി വീണ്ടും അന്വേഷണത്തിന് ഉത്തരവിട്ടതെന്നും ബാലഭാസ്കറിന്റെ പിതാവ് കെ.സി.ഉണ്ണിയും മാതാവ് ബി.ശാന്തകുമാരിയും പറഞ്ഞു
ദുരൂഹതകളെല്ലാം അവസാനിപ്പിച്ച്, പുതിയ അന്വേഷണ സംഘം സത്യം പുറത്തുകൊണ്ടുവരുമെന്ന പ്രതീക്ഷ ഇരുവരും പങ്കുവച്ചു. കേസ് സിബിഐയിലെ എസ്പി റാങ്കിൽ കുറയാത്ത ഉദ്യോഗസ്ഥൻ വീണ്ടും അന്വേഷിക്കണമെന്ന് ഹൈക്കോടതി കഴിഞ്ഞദിവസം ഉത്തരവിട്ടിരുന്നു.
മകന്റെ അപകടമരണവുമായി ബന്ധപ്പെട്ട് 8 വർഷത്തിനിടെ 4 അന്വേഷണങ്ങൾ നടന്നുവെന്ന് മാതാപിതാക്കൾ പറഞ്ഞു. അവയെല്ലാം അട്ടിമറിക്കപ്പെട്ടു. സിബിഐ അടക്കം പുതിയ അന്വേഷണ സംഘങ്ങൾ വന്നപ്പോഴെല്ലാം പ്രതീക്ഷയായിരുന്നു. പക്ഷേ അവരെല്ലാം മുൻ ഉദ്യോഗസ്ഥരുടെ കണ്ടെത്തലുകൾ അതേപടി പകർത്തിവയ്ക്കുകയാണ് ചെയ്തത്. തങ്ങളുടെ മൊഴികൾപോലും കൃത്യമായി രേഖപ്പെടുത്തിയില്ല. ബാലുവിനൊപ്പമുണ്ടായിരുന്ന പ്രകാശ് തമ്പി, ഡ്രൈവർ അർജുൻ, വിഷ്‌ണു സോമസുന്ദരം എന്നിവരുടെ ഇടപെടലുകളെക്കുറിച്ച് തെളിവുകൾ കൈമാറിയിട്ടും അന്വേഷണ ഉദ്യോഗസ്ഥർ അവഗണിച്ചു.
മകനു നീതിലഭിക്കുന്നതിനായി പോരാട്ടത്തിനിറങ്ങിയ തങ്ങൾക്കെതിരെ ആരോപണങ്ങളുന്നയിച്ച് കേസ് വഴിതിരിച്ചുവിടാനാണ് പലരും ശ്രമിക്കുന്നത്. മകന്റെ ഒരു സ്വത്തും ഇന്നുവരെ ആഗ്രഹിച്ചിട്ടില്ല. തങ്ങൾ രണ്ടുപേർക്കു കഴിയാൻ സ്വന്തമായി വീടും ചെലവുകൾക്കായി പെൻഷൻ തുകയുമുണ്ട്. ബാലുവിന്റെ കയ്യിൽനിന്നു പണംകൈപ്പറ്റിയവർ ചേർന്ന് അവനെ ചതിച്ച്, അപായപ്പെടുത്തിയെന്നാണ് വിശ്വസിക്കുന്നതെന്നും ഉണ്ണിയും ശാന്തകുമാരിയും പറഞ്ഞു
