ഏഷ്യൻ ഗെയിംസ് ക്രിക്കറ്റിൽ പുരുഷവിഭാഗത്തിൽ ഇന്ത്യ ഫൈനലിൽ കടന്നു. ശ്രീലങ്കയെ 124 റൺസിന് തോൽപ്പിച്ചാണ് ഇന്ത്യ ഫൈനലിലേക്ക് യോഗ്യത നേടിയത്. ഇതോടെ ഇന്ത്യ വെള്ളിയോ സ്വർണമോ നേടുമെന്ന് ഉറപ്പായി. ഫൈനലിൽ ഇന്ത്യ പാകിസ്ഥാനെ നേരിടും. ബംഗ്ലാദേശിനെ ആറ് വിക്കറ്റിന് തകർത്താണ് പാകിസ്ഥാൻ കലാശപ്പോരിന് യോഗ്യത നേടിയത്.
ടോസ് നഷ്ടപ്പെട്ട് ആദ്യം ബാറ്റുചെയ്ത ഇന്ത്യ നിശ്ചിത 20 ഓവറിൽ ഏഴിന് 169 റൺസ് നേടി. എന്നാൽ മറുപടി ബാറ്റിങ്ങിൽ ശ്രീലങ്കൻ ഇന്നിംങ്സ് 10 ഓവർ തികയുന്നതിന് മുമ്പ് അവസാനിച്ചു. അവർ 9.5 ഓവറിൽ 45 റൺസിന് പുറത്താകുകയായിരുന്നു.
ഇഷാൻ കിഷന്‍റെ ഒറ്റയാൾ പ്രകടനമാണ് ഇന്ത്യയ്ക്ക് മാന്യമായ സ്കോർ സമ്മാനിച്ചത്. 46 പന്തിൽനിന്ന് 80 റൺസാണ് ഇഷാൻ കിഷൻ നേടിയത്. നാല് ഫോറും അഞ്ച് സിക്സറും ഉൾപ്പെടുന്നതായിരുന്നു കിഷന്‍റെ ഇന്നിംഗ്സ്. ഓപ്പണറായി ഇറങ്ങിയ വൈഭവ് സൂര്യവംശി 38 റൺസ് നേടി. എന്നാൽ മലയാളി താരം സഞ്ജു സാംസണും(7) ക്യാപ്റ്റൻ ശ്രേയസ് അയ്യർക്കും(13), മറ്റൊരു ഓപ്പണർ അഭിഷേക് ശർമ്മയ്ക്കും(7) തിളങ്ങാനായില്ല. തിലക് വർമ്മ(2), ശിവം ദുബെ(3) എന്നിവരും നിരാശപ്പെടുത്തി. ശ്രീലങ്കയ്ക്കുവേണ്ടി തരിന്ദു രത്നായകെ, സഹൻ അരച്ചിഗെ എന്നിവർ രണ്ട് വിക്കറ്റുകൾ വീതം നേടി.
മറുപടി ബാറ്റിങ്ങിന് ഇറങ്ങിയ ശ്രീലങ്കയെ ജസ്പ്രിത് ബുംറയും അക്സർ പട്ടേലും ചേർന്ന് തകർക്കുകയായിരുന്നു. ഇരുവരും രണ്ട് വിക്കറ്റ് വീതം നേടി. അഭിഷേക് ശർമ്മയ്ക്കും രണ്ട് വിക്കറ്റ് ലഭിച്ചു. ഇന്ത്യയുടെ മികച്ച ഫീൽഡിങ്ങും ശ്രീലങ്കയെ വലച്ചു. മൂന്ന് ലങ്കക്കാരെ റണ്ണൌട്ടിലൂടെ പുറത്താക്കാനും ഇന്ത്യൻ ഫീൽഡർമാർക്ക് സാധിച്ചു.
