പൊന്നാനി: സംസ്ഥാനത്തെ റേഷൻ വ്യാപാരികളുടെ പ്രശ്നങ്ങളും ആകുലതകളും പരിഹരിച്ച് അവരുടെ ശാക്തീകരണം സർക്കാർ ഉറപ്പുവരുത്തുമെന്ന് ഭക്ഷ്യ-പൊതുവിതരണ വകുപ്പ് മന്ത്രി അഡ്വ. അനൂപ് ജേക്കബ് പറഞ്ഞു.കെ.എസ്.ആർ.ആർ.ഡി.എ. പൊന്നാനി താലൂക്ക് കൺവെൻഷനും സ്വീകരണ യോഗവും കൊല്ലൻപടിയിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
റേഷൻ കടകളുടെ നവീകരണവും വ്യാപാരികളുടെ തൊഴിൽ സുരക്ഷയും ഉറപ്പാക്കിയുള്ള വികസന പ്രവർത്തനങ്ങളുമായി സർക്കാർ മുന്നോട്ടുപോവുകയാണെന്ന് മന്ത്രി പറഞ്ഞു. നിലവിൽ ഇ-പോസ് മെഷീനുകളുടെ അപ്‌ഡേഷൻ നടന്നുവരികയാണ്. മുൻഗണനാ റേഷൻ കാർഡ് അനുവദിക്കുന്നതിനുള്ള മാനദണ്ഡങ്ങളിലെ ഇളവുകൾ പുനഃപരിശോധിക്കും. ഓണക്കാലത്ത് വിതരണം ചെയ്ത ഒ.എം.എസ്.എസ്. സ്പെഷ്യൽ അരി വിപണി വിലയേക്കാൾ 20 മുതൽ 30 ശതമാനം വരെ കുറവിൽ (കിലോയ്ക്ക് 26 രൂപ) വിതരണം ചെയ്യാൻ സാധിച്ചുവെന്നും അത് വൻ വിജയമായിരുന്നുവെന്നും അദ്ദേഹം ചൂണ്ടിക്കാട്ടി. ഈ പദ്ധതി തുടർന്നു കൊണ്ടുപോകുന്നതിനായി എഫ്.സി.ഐ. അധികൃതരുമായി ചർച്ച നടത്തിയിട്ടുണ്ടെന്നും മന്ത്രി കൂട്ടിച്ചേർത്തു.
ചടങ്ങിൽ കെ.എസ്.ആർ.ആർ.ഡി.എ. പൊന്നാനി താലൂക്ക് പ്രസിഡന്റ് പി.സി. ഇബ്രാഹിംകുട്ടി അധ്യക്ഷത വഹിച്ചു. ജില്ലയിലെ ആദ്യ സ്വീകരണത്തിൽ താലൂക്ക് കമ്മിറ്റിയുടെ ഉപഹാരം മന്ത്രി ഏറ്റുവാങ്ങി. താലൂക്ക് ഓഫീസിന്റെ ഉദ്ഘാടനവും മുഖ്യപ്രഭാഷണവും സംസ്ഥാന വർക്കിങ് പ്രസിഡന്റ് കാടാമ്പുഴ മൂസഹാജി നിർവഹിച്ചു.
നഗരസഭാ കൗൺസിലർ ടി.കെ. അഷ്‌റഫ്‌, കേരള കോൺഗ്രസ്‌ (ജേക്കബ്) ജില്ലാ പ്രസിഡന്റ് ഒ.ജെ. ബിജു, താലൂക്ക് സപ്ലൈ ഓഫീസർ മോഹൻദാസ്, കെ.എസ്.ആർ.ആർ.ഡി.എ. ഭാരവാഹികളായ ഫാറൂഖ് വെളിയങ്കോട്, പി.വി. മനോജ്‌കുമാർ, കെ. ഷറഫുദ്ദീൻ, കെ. നൗഷാദ്, പി. ഷാജഹാൻ, പി.പി. റിയാസ്, കെ.എം. മധു, വി. രാജേഷ്, എം. അശോകൻ, കെ. കോയ, കബീർ അമ്പാരത്ത്, രാജൻ എന്നിവർ പങ്കെടുത്തു.
