ചങ്ങരംകുളം:നാടിന്റെ ശുചിത്വ സംരക്ഷണത്തിനും മാലിന്യസംസ്കരണ പ്രവർത്തനങ്ങൾക്കും സേവനം ചെയ്യുന്ന ഹരിതകർമ സേനാംഗങ്ങളെ ആദരിക്കാനൊരുങ്ങി ചങ്ങരംകുളം സർവീസ് സഹകരണ ബാങ്ക്.ഓണാഘോഷങ്ങളുടെ ഭാഗമായി ആഗസ്റ്റ് 22ന് ബാങ്ക് ഓഡിറ്റോറിയത്തില് നടക്കുന്ന ചടങ്ങില് ആലങ്കോട് ഗ്രാമപഞ്ചായത്തിലെ ഹരിതകർമ സേനാംഗങ്ങളെ ബാങ്കിന്റെ നേതൃത്വത്തിൽ ആദരിക്കുകയും ഓണക്കോടി നൽകുകയും ചെയ്യും
വീടുകളിൽ നിന്ന് പ്ലാസ്റ്റിക് ഉൾപ്പെടെയുള്ള അജൈവ മാലിന്യങ്ങൾ ശേഖരിച്ച് തരംതിരിക്കുകയും ശാസ്ത്രീയമായ രീതിയിൽ തുടർസംസ്കരണത്തിനായി കൈമാറുകയും ചെയ്യുന്ന ഹരിതകർമ സേനയുടെ പ്രവർത്തനം കേരളത്തിലെ തദ്ദേശ സ്ഥാപനങ്ങളുടെ മാലിന്യസംസ്കരണ സംവിധാനത്തിൽ നിർണായക പങ്കാണ് വഹിക്കുന്നത്.നാടിന്റെ ശുചിത്വവും പരിസ്ഥിതി സംരക്ഷണവും ഉറപ്പാക്കുന്നതിൽ ഇവരുടെ സേവനം ഏറെ പ്രാധാന്യമർഹിക്കുന്നു.
സാധാരണക്കാരായ നിരവധി വനിതകളാണ് ഹരിതകർമ സേനയുടെ ഭാഗമായി വീടുകൾ തോറും എത്തി ഈ സേവനം നിർവഹിക്കുന്നത്. പലപ്പോഴും ശ്രദ്ധിക്കപ്പെടാതെ പോകുന്ന ഈ സേവനത്തിന് സമൂഹത്തിന്റെ അംഗീകാരവും പിന്തുണയും നൽകേണ്ടത് അനിവാര്യമാണെന്ന സന്ദേശമാണ് ചങ്ങരംകുളം സർവീസ് സഹകരണ ബാങ്കിന്റെ ഈ പ്രവർത്തനത്തിലൂടെ മുന്നോട്ടുവയ്ക്കുന്നത്.ഓണാഘോഷത്തിന്റെ ഭാഗമായി നടത്തുന്ന ഈ ആദരം, നാടിന്റെ ശുചിത്വത്തിനും പരിസ്ഥിതി സംരക്ഷണത്തിനുമായി പ്രവർത്തിക്കുന്ന ഹരിതകർമ സേനാംഗങ്ങളോടുള്ള നന്ദിയും ആദരവും പ്രകടിപ്പിക്കുന്നതിന്റെ ഭാഗമായാണ് സംഘടിപ്പിക്കുന്നതെന്ന് ബാങ്ക് ഭാരവാഹികള് പറഞ്ഞു .
