കൊളാടി ഗോവിന്ദൻകുട്ടി സ്മാരക സമഗ്ര സംഭാവനാ പുരസ്കാരം ഡോ: ടി.ടി. ശ്രീകുമാറിന്

പൊന്നാനി:വന്നേരിനാടിന്റെ സാമൂഹിക രാഷ്ട്രീയ സാംസ്കാരിക ചരിത്രത്തിലെ അവിസ്മരണീയ പ്രതിഭയും മുൻ എംഎൽഎയും കമ്മ്യൂണിസ്റ്റ് നേതാവുമായ കൊളാടി ഗോവിന്ദൻകുട്ടിയുടെ സ്മരണാർത്ഥം യുവകലാസാഹിതിയും കൊളാടി ഗോവിന്ദൻകുട്ടി ട്രസ്റ്റും ഏർപ്പെടുത്തിയ കൊളാടി ഗോവിന്ദൻകുട്ടി സ്മാരക സമഗ്ര സംഭാവനാ പുരസ്കാരം നവമാർക്സിയൻ ചിന്തകനും എഴുത്തുകാരനും രാഷ്ട്രീയ നിരീക്ഷകനും പ്രഭാഷകനുമായ ഡോ: ടി.ടി. ശ്രീകുമാറിന്. 15,000 രൂപയും ഫലകവും പ്രശസ്തി പത്രവും അടങ്ങുന്നതാണ് പുരസ്‌കാരം. ഡോ. ടി.ടി. ശ്രീകുമാർ ഗ്രന്ഥങ്ങളും പഠനങ്ങളും ലേഖന സമാഹാരങ്ങളുമുൾപ്പെടെ മലയാളത്തിലും ഇംഗ്ലീഷിലുമായി ഇതിനകം മുപ്പതിലധികം കൃതികൾ പ്രസിദ്ധീകൃതമായിട്ടുണ്ട്. ഉത്തരാധുനിക തയ്ക്കപ്പുറം, പുനർവായനയിലെ മാർക്‌സിസം, നരവംശ ശാസ്ത്ര കുറിപ്പുകളിലെ കാൾ മാർക്‌സ്, നവോത്ഥാന ചരിത്ര ദർശനം തുടങ്ങി യവ പ്രധാന രചനകളാണ്. മലയാള വാരിക കളിൽ സ്ഥിരമായി ലേഖനങ്ങൾ എഴുതാറുണ്ട്.ഡൽഹി ജവഹർലാൽ നെഹ്രു യൂണിവേഴ്‌സിറ്റിയിൽനിന്ന് എം ഫിൽ ബിരുദവും ഹോങ്കോങ്ങ് യൂണിവേഴ്‌സിറ്റിയിൽ നിന്ന് പി എച്ച് ഡിയും കരസ്ഥമാക്കി.അമ്പലപ്പുഴ സ്വദേശിയാണ്. ഹൈദ്രാബാദ് ഇംഗ്ലീഷ് ആൻഡ് ആൻ്റ് ഫോറിൻ ലാംഗ്വേജസ് യൂണിവേഴ്‌സിറ്റിയിൽ പ്രൊഫസറാണ്. വ്യാഴാഴ്ച പൊന്നാനി എരമംഗലം എ എൽ പി സ്കൂൾ കോൺഫറൻസ് ഹാളിൽ നടക്കുന്ന കൊളാടി ഗോവിന്ദൻകുട്ടി അനുസ്മരണ സമ്മേളനത്തിൽ ഡോ: ടി.ടി. ശ്രീകുമാറിന് പുരസ്കാരം കൈമാറും.അനുസ്മരണ സമ്മേളനം അഡ്വക്കേറ്റ് കെ രാജൻ എംഎൽഎ ഉദ്ഘാടനം ചെയ്യും. സിപിഐ സംസ്ഥാന അസിസ്റ്റന്റ് സെക്രട്ടറി പി പി സുനീർ എംപി അധ്യക്ഷത വഹിക്കും. കവി ആലങ്കോട് ലീലാകൃഷ്ണൻ മുഖ്യപ്രഭാഷണം നടത്തും. ഡോ. അനിൽ ചേലമ്പ്ര അനുസ്മരണ പ്രഭാഷണം നടത്തും. സിപിഐ മലപ്പുറം ജില്ലാ സെക്രട്ടറി പി കെ കൃഷ്ണദാസ്, ഇ എം സതീശൻ തുടങ്ങിയവർ പങ്കെടുക്കും.