ചാലിശ്ശേരി സെന്ററിൽ പ്രവർത്തിക്കുന്ന ‘ഷഹല ഗാർമെന്റ്സ്’ എന്ന വസ്ത്രവ്യാപാര സ്ഥാപനത്തിൽ വൻ തീപിടുത്തം.അപകടത്തിൽ കടയ്ക്കകത്തുണ്ടായിരുന്ന ഫാൻ,ഫർണിച്ചറുകൾ, പ്രദർശനത്തിന് വെച്ചിരുന്ന വസ്ത്രങ്ങൾ എന്നിവ പൂർണ്ണമായും കത്തിനശിച്ചു.അമ്പതിനായിരത്തിലധികം രൂപയുടെ സാമ്പത്തിക നഷ്ടമാണ് പ്രാഥമികമായി കണക്കാക്കുന്നത്.ബുധനാഴ്ച പുലർച്ചെ ഏഴ് മണിയോടെയാണ് നാടിനെ നടുക്കിയ സംഭവം.
കട അടഞ്ഞുകിടക്കുന്ന സമയത്ത് ഉള്ളിൽ നിന്ന് കട്ടിയിൽ പുക ഉയരുന്നത് സമീപവാസികളുടെയും വഴിയാത്രക്കാരുടെയും ശ്രദ്ധയിൽപ്പെടുകയായിരുന്നു. ഉടൻതന്നെ നാട്ടുകാർ പോലീസിലും ഫയർഫോഴ്സിലും വിവരമറിയിച്ചു.ഫയർഫോഴ്സ് എത്തുന്നതുവരെ കാത്തുനിൽക്കാതെ നാട്ടുകാർ സംഘടിച്ച് വെള്ളമൊഴിച്ച് തീ കെടുക്കാൻ ശ്രമിച്ചതാണ് തൊട്ടടുത്തുള്ള മറ്റ് സ്ഥാപനങ്ങളിലേക്ക് തീ പടരാതെ വലിയൊരു ദുരന്തം ഒഴിവാക്കിയത്.വിവരമറിഞ്ഞ് കുന്നംകുളത്തുനിന്ന് ഫയർ ഫോഴ്സ് യൂണിറ്റ് സ്ഥലത്തെത്തി തുടർനടപടികൾ സ്വീകരിക്കുകയും സ്ഥിതിഗതികൾ പൂർണ്ണമായി നിയന്ത്രണവിധേയമാക്കുകയും ചെയ്തു.കടയ്ക്കകത്തെ ഫാനിൽ നിന്നുണ്ടായ ഷോർട്ട് സർക്യൂട്ടാണ് തീപിടുത്തത്തിന് കാരണമെന്നാണ് പ്രാഥമിക നിഗമനം
