പാരലല്‍ സര്‍വ്വീസ് നിര്‍ത്തിയതോടെ നിലച്ച് പോയ ആ സൗഹൃദങ്ങള്‍ മൂന്ന് പതിറ്റാണ്ടിന് ശേഷം ചങ്ങരംകുളത്ത് ഒത്തുചേര്‍ന്നു

ചങ്ങരംകുളം:പാരലല്‍ സര്‍വ്വീസ് നിര്‍ത്തിയതോടെ നിലച്ച് പോയ ആ സൗഹൃദം നീണ്ട 30 വര്‍ഷങ്ങള്‍ക്ക് ശേഷം ചങ്ങരംകുളത്ത് വീണ്ടും ഒത്തുചേര്‍ന്നു.ചങ്ങരംകുളം ഹൈവെ സ്റ്റാന്റില്‍ 30 വര്‍ഷം മുമ്പ് ജോലി ചെയ്തിരുന്ന 25 ഓളം ഡ്രൈവര്‍മാരാണ് 3 പതിറ്റാണ്ടിന് ശേഷം ചങ്ങരംകുളത്ത് ഒത്ത്ചേര്‍ന്നത്.ഉള്‍ റോഡുകളില്‍ സ്വകാര്യ ബസ്സുകള്‍ ഇല്ലാത്ത കാലത്ത് പാരലല്‍ ജീപ്പ്,ചലഞ്ചര്‍ സര്‍വ്വീസ് മാത്രം ആശ്രയിച്ചിരുന്ന 95-2000 കാലഘട്ടത്തിലെ ഡ്രൈവര്‍മാരാണ് കാലങ്ങള്‍ക്ക് ശേഷം ഒന്നിച്ച് ചേര്‍ന്നത്.ആലംകോട് കക്കിടിപ്പുറം കുറ്റിപ്പാല ഭാഗത്തേക്കും,കോക്കൂര്‍ കൊഴിക്കര എറവക്കാട് ഭാഗത്തേക്കും സര്‍വ്വീസ് നടത്തിയിരുന്ന ജീപ്പ്,ചലഞ്ചര്‍ ജീവനക്കാര്‍ പലരും വിദേശത്തും മറ്റുമായി വിവിധ ജോലികള്‍ ചെയ്ത് വരികയാണ്.വാട്ട്സപ്പ് വഴി കൂട്ടായ്മ ഉണ്ടാക്കിയാണ് മൂന്ന് പതിറ്റാണ്ട് മുമ്പ് ഉണ്ടായിരുന്ന സൗഹൃദം ഇവര്‍ പുതുക്കിയത്.ത്രിവേണി റസ്റ്റോറന്റ് ഹാളില്‍ ഒത്ത് ചേര്‍ന്ന ഡ്രൈവര്‍മാര്‍ പഴയകാല ഓര്‍മകള്‍ പങ്ക് വെച്ച് കുട്ടായ്മ ശക്തമായി നില നിര്‍ത്താനുള്ള ചര്‍ച്ചകള്‍ നടത്തിയാണ് പിരിഞ്ഞത്