തിരുവനന്തപുരം: സ്ത്രീകൾക്ക് സൗജന്യ യാത്ര അനുവദിച്ചുള്ള പ്രിയദർശിനി പദ്ധതിക്ക് പിന്നാലെ സ്ത്രീകൾക്ക് മാത്രമായി പിങ്ക് ബസ് സർവീസ് ആരംഭിച്ച് കെ.എസ്.ആർ.ടി.സി. പ്രാരംഭ ഘട്ടമായി തിരുവനന്തപുരം നഗരത്തിലെ ടെക്നോപാർക്ക് റൂട്ടിലാണ് സർവീസ് നടത്തുന്നത്. സ്ത്രീകൾക്ക് സുരക്ഷിതമായ രാത്രികാല യാത്ര ഉറപ്പാക്കുന്നതിനായാണ് പിങ്ക് ബസ് സർവീസ് ആരംഭിക്കുന്നതെന്നാണ് മന്ത്രി അറിയിച്ചിരിക്കുന്നത്.
രാത്രി ഒമ്പത് മണിക്ക് ശേഷമായിരിക്കും പിങ്ക് ബസിന്റെ സർവീസുകൾ. ഒമ്പത് മണിക്ക് ശേഷം സ്ത്രീ യാത്രക്കാർ, ആശുപത്രി ജീവനക്കാർ, ട്രെയിൻ മാർഗം തമ്പാനൂരിലെത്തുന്ന രോഗികളും കൂട്ടിരിപ്പുകാരും, രാത്രി പത്തിനും രാവിലെ അഞ്ചിനുമിടയിലുള്ള ഷിഫ്റ്റുകളിൽ ജോലി കഴിഞ്ഞ് മടങ്ങുന്ന ഐ.ടി. ജീവനക്കാരും ഉൾപ്പെടെ നിരവധി പേർക്ക് ഈ സർവീസ് വലിയ ആശ്വാസമാകുമെന്ന് കെഎസ്ആർടിസിയുടെ പ്രതീക്ഷ.
സർവീസുകളുടെ കൃത്യത ഉറപ്പാക്കുന്നതിനും വരുമാനം വർധിപ്പിക്കുന്നതിനും ഓൺലൈൻ റിസർവേഷൻ സൗകര്യം ഒരുക്കാനും ഭാവിയിൽ ഇലക്ട്രിക് ബസുകൾ പിങ്ക് ബസായി ഓടിക്കാനുമാണ് കെഎസ്ആർടിസിയുടെ പദ്ധതി. നിലവിൽ പിങ്ക് ബസിന് സർവീസ് നടത്തുന്നതിനായി കെഎസ്ആർടിസിയിൽ അടുത്തിടെ എത്തിയ ലിങ്ക് ബസുകളിൽ ഒന്നാണ് അനുവദിച്ചിരിക്കുന്നത്.
