ചങ്ങരംകുളം:ആലങ്കോട് ഗ്രാമപഞ്ചായത്ത് പരിധിയില് കഴിഞ്ഞ ദിവസം നടന്ന തെരുവുനായ അക്രമണത്തിന്റെ പശ്ചാത്തലത്തിൽ പ്രതിരോധ പ്രവർത്തന പദ്ധതികൾ തയ്യാറാക്കാൻ ആലങ്കോട് ഗ്രാമപഞ്ചായത്തും മൃഗസംരക്ഷണ വകുപ്പും സംയുക്ത യോഗം ചേർന്നു.പഞ്ചായത്ത് ഹാളിൽ നടന്ന യോഗത്തിൽ പ്രസിഡന്റ് ആസിയ ഇബ്രാഹിം അധ്യക്ഷത വഹിച്ചു.
പ്രതിരോധ നടപടികളുടെ സാങ്കേതിക വശങ്ങൾ വിശദമായി പരിശോധിച്ച ശേഷം അടിയന്തര നടപടികളുമായി മുന്നോട്ട് പോവാൻ യോഗം തീരുമാനിച്ചു.പഞ്ചായത്ത് വൈസ് പ്രസിഡന്റ് സുബൈർ ഉദിനുപറമ്പ്,സ്റ്റാന്റിംഗ് കമ്മിറ്റി ചെയർമാന്മാരായ ശാരിക മുരളീധരൻ,ഫാത്തിമ ലത്തീഫ്,ചങ്ങരംകുളം മൃഗാശുപത്രി സീനിയർ വെറ്റിനറി സർജൻ ഡോ പാമി ടി മാളിയേക്കൽ,പഞ്ചായത്ത് സെക്രട്ടറി അഭിജിത്ത്,അസിസ്റ്റന്റ് സെക്രട്ടറി സുധൻ,ഹെൽത്ത് ഇൻസ്പെക്ടർ വേണു വാർഡ് മെമ്പർമാരായ കെ മാധവൻ,വിപിൻ കെ വി ,സതി രാജൻ,ഷമീന മുഹമ്മദ് എന്നിവരും സംബന്ധിച്ചു.
കഴിഞ്ഞ ദിവസം ആലംകോട് ജുമാമസ്ജിദിന് മുന്നില് 6 വയസുകാരനെ തെരുവ് നായ അക്രമിക്കുകയും രക്ഷപ്പെടുത്താന് എത്തിയ ബന്ധുവിനും മദ്രസ അധ്യാപകനും അടക്കം തെരുവ് നായയുടെ അക്രമത്തില് പരിക്കേറ്റിരുന്നു.ഈ അക്രമത്തിന്റെ ദൃശ്യം സമൂഹമാധ്യമങ്ങളില് വ്യാപകമായി പ്രചരിക്കുകയും ചെയ്തിരുന്നു
