പൊന്നാനി: പൊന്നാനി ഹാർബറിലെ കോമ്പൗണ്ടിൽ അറ്റകുറ്റ പണികൾക്കായി അഴിച്ചു വെച്ചിരുന്ന 5 ഇരുമ്പുഗേറ്റുകൾ മോഷണം പോയ സംഭവത്തിൽ 3 പേർ കൂടി അറസ്റ്റിലായി.മുഖ്യ പ്രതി ടോൾ ജീവനക്കാരൻ ഹുസൈൻ അറസ്റ്റിലായതിനു പിന്നാലെയാണ് മോഷണം നടത്തുന്നതിന് സഹായിച്ച മൂന്ന് പേരെ കൂടി പൊന്നാനി പോലീസ് അറസ്റ്റ് ചെയ്തത്.
പൊന്നാനി അഴീക്കൽ സ്വദേശികളായ പാലക്കൽ യൂനസ് (37)പുതിയ പുരയിൽ ഉസ്മാൻ (62) ഏഴു കുടിക്കൽ യാസിർ (49)എന്നിവരെയാണ് പൊന്നാനി സി.ഐ കെ. സതീ ഷ് കുമാറിൻ്റെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തത്.ഹാർബർ എൻജിനീയറിങ് വകുപ്പ് അസിസ്റ്റൻ്റ് എൻജിനീയർ പൊന്നാനി പൊലീസിൽ നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്ത് അന്വേഷണം നടത്തിയത്.
കേസിൽ മുഖ്യ പ്രതി ഹാജിയാരകത്ത് ഹുസൈനെ നേരത്തെ അന്വേഷണ സംഘം അറസ്റ്റ് ചെയ്തിരുന്നു.മോഷണം നടത്തുന്നതിന് സഹായം നൽകിയവരാണ് പിടിയിലായ 3 പ്രതികൾ, അടുത്ത ദിവസം തന്നെ പ്രതികളെ കസ്റ്റഡിയിൽ വാങ്ങി തെളിവെടുപ്പ് നടത്തുമെന്നും പൊലീസ് പറഞ്ഞു.എസ്. ഐ. ആന്റോ ഫ്രാൻസിസ്,എസ് സി പി ഒ മാരായ നാസർ,രജിൻ,പ്രശാന്ത് കുമാർ എസ്,സിപിഒ മാരായ ഹരിപ്രസാദ്,ടിജിൻ എന്നിവർ ചേർന്ന അന്വേഷണ സംഘമാണ് പ്രതികളെ പിടികൂടിയത്
