എടപ്പാൾ:പഞ്ചായത്തിലെ വിവിധ റോഡുകളുടെ ശോചനീയാവസ്ഥയ്ക്ക് അടിയന്തര പരിഹാരം കാണണമെന്നാവശ്യപ്പെട്ട് പഞ്ചായത്ത് ജനപ്രതിനിധി സംഘം പൊന്നാനി പി.ഡബ്ല്യു.ഡി ഓഫീസിൽ ഉദ്യോഗസ്ഥരുമായി ചർച്ച നടത്തി.പഞ്ചായത്ത് പ്രസിഡന്റ് കെ.പി. സിന്ധുവിന്റെ നേതൃത്വത്തിലായിരുന്നു സന്ദർശനം.
യാത്രാക്ലേശം രൂക്ഷമായ ഡി.എച്ച്.ഒ.എച്ച്.എസ്.എസ് പൂക്കരത്തറ സ്കൂൾ പരിസരത്തെ റോഡിന്റെ അറ്റകുറ്റപ്പണി എത്രയും വേഗം പൂർത്തിയാക്കുമെന്ന് പി.ഡബ്ല്യു.ഡി അധികൃതർ ഉറപ്പ് നൽകി.പഞ്ചായത്തിലെ മറ്റ് പ്രധാന റോഡുകളിലെ തകർച്ചയും അടിയന്തരമായി പരിഹരിക്കുമെന്നും അറിയിച്ചു.റോഡരികിലെ അപകടഭീഷണിയുള്ള മരങ്ങളും മരച്ചില്ലകളും മുറിച്ചുമാറ്റാനും,റോഡിൽ അടിഞ്ഞുകൂടിയ മണ്ണ് നീക്കം ചെയ്ത് ഗതാഗതം സുഗമമാക്കാനും തീരുമാനമായി. വരും ദിവസങ്ങളിൽ തന്നെ പ്രവൃത്തികൾ ആരംഭിക്കുമെന്നാണ് വിവരം.
വൈസ് പ്രസിഡന്റ് ബുഷ്റ ജലീൽ, ആരോഗ്യ-വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ കെ.വി. മുഹമ്മദ് ലൈസ്, ആസൂത്രണ സമിതി ഉപാധ്യക്ഷൻ ചുള്ളിയിൽ രവീന്ദ്രൻ എന്നിവരും സംഘത്തിലുണ്ടായിരുന്നു.
