മിന: ഹജ്ജ് കർമത്തിന്റെ രണ്ടാംദിവസമായ ചൊവ്വാഴ്ച ലോകത്തിന്റെ വിവിധ ഭാഗങ്ങളിൽനിന്ന് എത്തിയ ലക്ഷക്കണക്കിന് തീർഥാടകർ പ്രധാന ചടങ്ങായ അറഫാ സംഗമത്തിൽ പങ്കെടുക്കും. തിങ്കളാഴ്ച മിനായിൽ പ്രാർഥനയിലും ധ്യാനത്തിലും കഴിഞ്ഞവർ ചൊവ്വാഴ്ച പുലർച്ചെമുതൽ അറഫയിലേക്ക് തിരിച്ചിരുന്നു.
‘ഹജ്ജ് എന്നാൽ അറഫയാണ്’ എന്ന് പ്രവാചകൻ മുഹമ്മദ് നബി പറഞ്ഞതായി വിശ്വാസികൾ ഓർക്കുന്ന ദിനമാണിത്. അതുകൊണ്ടുതന്നെ ഹജ്ജിലെ ഏറ്റവും പ്രധാനപ്പെട്ട ചടങ്ങായാണ് അറഫാസംഗമം കണക്കാക്കപ്പെടുന്നത്.അറഫയിൽ പങ്കെടുക്കാത്തവർക്ക് ഹജ്ജ് പൂർത്തിയാകില്ലെന്നും ഇസ്ലാമിക പാരമ്പര്യത്തിൽ വ്യക്തമാക്കപ്പെടുന്നു.ആശുപത്രികളിൽ ചികിത്സയിലുള്ള ഹാജിമാരെപ്പോലും ആംബുലൻസുകളിലും പ്രത്യേകവാഹനങ്ങളിലുമായി അറഫയിൽ എത്തിക്കുന്നതിനായി സൗദി അധികൃതർ വിപുലമായ സംവിധാനങ്ങളാണ് ഒരുക്കിയിരിക്കുന്നത്.
ഇസ്ലാമിക വിശ്വാസപ്രകാരം, ആദിമപിതാവായ ആദം നബിയും ആദിമ മാതാവായ ഹവ്വയും സ്വർഗത്തിൽനിന്ന് ഭൂമിയിലിറങ്ങിയശേഷം വർഷങ്ങൾക്കിപ്പുറം വീണ്ടും കണ്ടുമുട്ടിയത് അറഫയിൽ വെച്ചാണെന്ന് വിശ്വസിക്കപ്പെടുന്നു.
അറഫ അതിർത്തിയിലെ നമിറ പള്ളിയിൽ ചൊവ്വാഴ്ച ഉച്ചയ്ക്ക് വാർഷിക ഹജ്ജ് പ്രഭാഷണം നടക്കും.അതിനുശേഷം ഹാജിമാർ ദുഹ്ർ, അസർ നമസ്കാരങ്ങൾ ഒന്നിച്ച് നിർവഹിച്ച് അറഫ മൈതാനിയിൽ പ്രാർഥനയിൽ മുഴുകും.
ജബലുറഹ്മയ്ക്ക് ചുറ്റുമായി ലക്ഷക്കണക്കിന് വിശ്വാസികൾ കൈകൾ ഉയർത്തി പ്രാർഥിക്കുന്ന ദൃശ്യങ്ങൾ ഹജ്ജിലെ ഏറ്റവും ഹൃദയസ്പർശിയായ നിമിഷങ്ങളിലൊന്നായി കണക്കാക്കപ്പെടുന്നു.
സൂര്യാസ്തമയത്തോടെ ഹാജിമാർ മുസ്ദലിഫയിലേക്ക് നീങ്ങും. അവിടെ ചൊവ്വാഴ്ച രാത്രി ചെലവഴിച്ചശേഷം ബുധനാഴ്ച പ്രഭാതംമുതൽ ജംറകളിൽ പിശാചിന്റെ പ്രതീകങ്ങൾക്ക് നേരേയുള്ള കല്ലേറുകർമം ആരംഭിക്കും.ബുധൻ, വ്യാഴം, വെള്ളി ദിവസങ്ങളിലായി ജംറ കർമങ്ങൾ പൂർത്തിയാക്കിയാൽ വിശുദ്ധ ഹജ്ജ് സമാപിക്കും.
