ചങ്ങരംകുളം:അമ്പത് വർഷത്തെ സേവനപര്യവസാനം പൂർത്തിയാകുന്ന അവസരത്തിൽ മത-സാമൂഹിക രംഗങ്ങളിൽ ദീർഘകാലമായി സജീവ സാന്നിധ്യമായി പ്രവർത്തിച്ചു വരുന്ന വളയംകുളം മൂസ മുസ്ലിയാർക്ക് ആദരവ് ഒരുങ്ങുന്നു.സമസ്ത കേരള ജംഇയ്യത്തുൽ മുഅല്ലിമീൻ കോക്കൂർ റെയ്ഞ്ച് കമ്മിറ്റിയാണ് ആദരവേദിക്ക് നേതൃത്വം നൽകുന്നത്.
സമസ്ത മലപ്പുറം ജില്ലാ മുശാവറ അംഗം, കോക്കൂർ റെയ്ഞ്ച് കമ്മിറ്റി പ്രസിഡണ്ട്, ജംഇയ്യത്തുൽ ഖുത്വബാ മേഖല ട്രഷറർ, സുന്നി മഹല്ല് ഫെഡറേഷൻ പ്രസിഡണ്ട്, എടപ്പാൾ ദാറുൽ ഹിദായ സ്ഥാപനങ്ങളുടെ കമ്മിറ്റി അംഗം എന്നീ നിലകളിൽ ഉൾപ്പെടെ, സമസ്തയുടെയും അനുബന്ധ സംഘടനകളുടെയും വിവിധ തലങ്ങളിൽ മൂസ മുസ്ലിയാർ നിർവഹിച്ച സേവനങ്ങൾ ശ്രദ്ധേയമാണെന്ന് സംഘാടകർ അറിയിച്ചു. മഹല്ല് കമ്മിറ്റികളുടെ ഉപദേശകനായും, മദ്രസ അധ്യാപകരുടെ കാര്യദർശിയായും, കുടുംബ പ്രശ്നങ്ങളിൽ മസ്ലഹത്തിന്റെ മാർഗദർശിയായും അദ്ദേഹം നടത്തിയ പ്രവർത്തനങ്ങളും വിലമതിക്കപ്പെടുന്നവയാണെന്നും അവർ കൂട്ടിച്ചേർത്തു.
ആദരവേദിയുടെ വിജയകരമായ നടത്തിപ്പിനായി സ്വാഗതസംഘ രൂപീകരണ കൺവെൻഷൻ മെയ് 17-ന് വൈകുന്നേരം 4 മണിക്ക് ചങ്ങരംകുളം മറീന റീജൻസിയിൽ നടക്കും.സമസ്തയുടെയും പോഷക ഘടകങ്ങളുടെയും നേതാക്കളും, മഹല്ല് ഭാരവാഹികളും, റെയ്ഞ്ച് കമ്മിറ്റി അംഗങ്ങളും,ഉസ്താദുമാരും,സാമൂഹ്യ-സാംസ്കാരിക-രാഷ്ട്രീയ രംഗങ്ങളിലെ പ്രവർത്തകരും പങ്കെടുക്കണമെന്ന് സംഘാടകർ അഭ്യർത്ഥിച്ചു.യോഗത്തിൽ കോക്കൂർ റെയ്ഞ്ച് പ്രസിഡണ്ട് അബ്ദുൽ ഖാദർ ഫൈസി തലക്കശ്ശേരി അധ്യക്ഷത വഹിച്ചു.അബ്ദുസ്സലാം മൗലവി എറവറാംകുന്ന് ഉദ്ഘാടനം നിർവഹിച്ചു.ഇബ്രാഹിം അസ്ഹരി,സൈതലവി ദാരിമി, സക്കരിയ ബദരി, സൈനുദ്ദീൻ മുസ്ലിയാർ, ഉമർ മൗലവി, മുബാറക്ക് മൗലവി, റഫീഖ് മൗലവി എന്നിവർ സംബന്ധിച്ചു. നൂറുദ്ദീൻ വളയംകുളം സ്വാഗതവും അനസ് ബാഖവി ഉദിനുപ്പറമ്പ് നന്ദിയും പറഞ്ഞു.
