കുതിച്ചുയർന്ന് ചെറുനാരങ്ങ വില; കിലോയ്ക്ക് 270 രൂപ

ചെറുനാരങ്ങ വില കുതിച്ചുകയറുന്നു. ഒരു കിലോഗ്രാമിന് തിങ്കളാഴ്ചത്തെ വില 270 രൂപയാണ്. ചില്ലറ വിൽപന നടത്തുന്ന കടകളിൽ കാൽകിലോയ്ക്ക് 70 രൂപയാണ് വാങ്ങുന്നത്. ഒരു മാസം മുമ്പ് കിലോയ്ക്ക് നൂറുരൂപയിൽ താഴെയായിരുന്നു വില.വിഷുത്തലേന്ന് 180 രൂപയുണ്ടായിരുന്ന നാരങ്ങാവില ഒരാഴ്ച പിന്നിടും മുമ്പുതന്നെ 200-ലെത്തി. ചെറിയ നാരങ്ങയുടെ വില കുതിച്ചുകയറുന്നത് കാരണം വേനൽ ചൂടിൽ ദാഹമകറ്റാൻ നാരങ്ങാവെള്ളം കുടിക്കാമെന്ന് കരുതിയാൽ കീശ ചോരും. നാരങ്ങാവെള്ളത്തിന് 20-ൽ നിന്ന് 25 രൂപയായി പലയിടത്തും.ഒരു നാരങ്ങ മുറിച്ച് രണ്ട് ഗ്ലാസുകളിലാണ് ഇപ്പോൾ നാരങ്ങാവെള്ളം എടുക്കുന്നത്. തമിഴ്‌നാട്ടിൽ നിന്നാണ് പ്രധാനമായും നാരങ്ങയെത്തുന്നത്. വേനൽച്ചൂട് കൂടിയതോടെ ശീതളപാനീയ കടകളിൽ ഇപ്പോൾ തിരക്കുകുറഞ്ഞ നേരമില്ല. ശീതളപാനീയങ്ങളിൽ പ്രിയം നാരങ്ങാവെള്ളത്തിന് തന്നെയാണ്. ഇതും നാരാങ്ങാവിലയിൽ പ്രതിഫലിച്ചു കാണാം. വേനൽ ശക്തമായതോടെ ഉത്പാദനം കുറഞ്ഞതും ആവശ്യക്കാർ വർധിച്ചതുമാണ് വില കൂടാൻ കാരണമെന്ന് വ്യാപാരികൾ പറയുന്നു.