ചങ്ങരംകുളം:തിരഞ്ഞെടുപ്പ് തിരക്ക് ഒഴിഞ്ഞതോടെ മലയാളികള് വിഷുവിനെ വരവേല്ക്കാനുള്ള തിരക്കിലാണ്.വിപണിയില് വിഷുവിന്റെ തിരക്കേറിയതോടെ പടക്ക വിപണിയിയും സജീവമാണ്.പൂത്തിരി, മാലപടക്കം, മേശപ്പൂവ്, ചക്രം, റോക്കറ്റ് തുടങ്ങി പതിവ് ഐറ്റങ്ങള്ക്കൊപ്പം ഇത്തവണ നിരവധി ചൈനീസ് വെറൈറ്റികളും വിപണിയിലെത്തിയിട്ടുണ്ട്.
വിഷു ആഘോഷങ്ങളുടെ ഭാഗമായി വീടുകളിലും ക്ഷേത്രപരിസരങ്ങളിലും പടക്കം പൊട്ടിക്കൽ പതിവായതിനാൽ വിവിധ തരത്തിലുള്ള പടക്കങ്ങൾക്ക് ആവശ്യക്കാരേറെയാണ്.പടക്കത്തിന്റെ മൊത്തവിതരണ സ്ഥാപനങ്ങളില് വലിയ തിരക്കാണ് അനുഭവപ്പെടുന്നത്.
വിഷുവിന് ദിവസങ്ങള് മാത്രം ബാക്കി നില്ക്കെ ചെറുകിട പടക്ക കച്ചവടക്കാരും തെരുവോര കച്ചവടക്കാരും വിപണി കയ്യടക്കുകയാണ്.
കുട്ടികള്ക്കൊപ്പം മുതിർന്നവരെയും ഒരുപോലെ ആകർഷിക്കുന്ന വിധത്തിലുള്ള വർണാഭമായ പടക്കങ്ങളാണ് കടകളിൽ പ്രദർശിപ്പിച്ചിരിക്കുന്നത്.ചൈനീസ് മെത്തേട് ഐറ്റങ്ങളായ ജോളി മോബി മോക്ക് ടൈല്,മോബി ക്രക്റിംഗ് ,റോട്ടിങ് കമ്പി, കമ്പി ചക്രം, മുകളില് കയറി പൊട്ടുന്ന
ഷോർട് 30,ഷോര്ട്ട് 60 ,തുടങ്ങിയ വെറൈറ്റി ഐറ്റങ്ങള്ക്ക് വിപണിയില് ആവശ്യക്കാര് ഏറെയാണ്.
കഴിഞ്ഞ വർഷത്തെ അപേക്ഷിച്ച് ഇത്തവണ പടക്കങ്ങളുടെ വിലയിൽ ചെറിയ വർധനവുണ്ടെന്നും വ്യാപാരികൾ പറയുന്നു.അസംസ്കൃത വസ്തുക്കളുടെ വിലക്കയറ്റവും ഗതാഗതച്ചെലവുകളും വർധിച്ചതാണ് ഇതിന് കാരണമെന്നും എന്നിരുന്നാലും വിഷു ആഘോഷങ്ങളിൽ പടക്കങ്ങൾ ഒഴിവാക്കാനാകാത്ത ഘടകമായതിനാൽ ആവശ്യക്കാര്ക്ക് കുറവില്ലെന്നും വ്യാപാരികള് പറയുന്നു.
അതേസമയം സുരക്ഷാ മാനദണ്ഡങ്ങൾ കർശനമായി പാലിക്കണമെന്ന് ഫയർഫോഴ്സും പോലീസും മുന്നറിയിപ്പ് നൽകി. അനധികൃത സ്റ്റാളുകളിൽ നിന്ന് പടക്കങ്ങൾ വാങ്ങരുതെന്നും,കുട്ടികൾ പടക്കം പൊട്ടിക്കുമ്പോൾ മുതിർന്നവരുടെ മേൽനോട്ടം നിർബന്ധമാണെന്നും അധികൃതർ നിർദേശിക്കുന്നു.തീപിടിത്തം പോലുള്ള അപകടങ്ങൾ ഒഴിവാക്കാൻ വെള്ളം, മണൽ തുടങ്ങിയവ സമീപത്ത് കരുതണമെന്നും നിർദേശം നൽകിയിട്ടുണ്ട്.പരിസ്ഥിതി മലിനീകരണത്തെ കുറിച്ചും ആശങ്ക ഉയരുന്ന സാഹചര്യത്തിൽ ശബ്ദ മലിനീകരണം കുറവുള്ള ഗ്രീൻ ക്രാക്കേഴ്സുകൾ ഉപയോഗിക്കാൻ നിർദേശങ്ങളും ഉയരുന്നുണ്ട്. വിഷു ദിനം അടുക്കുമ്പോൾ വിപണിയിലെ തിരക്ക് ഇനിയും വർധിക്കുമെന്ന പ്രതീക്ഷയിലാണ് വ്യാപാരികൾ.ആഘോഷങ്ങളുടെ ആവേശം ഉയർത്തിക്കൊണ്ട് പടക്ക വിപണി ഇത്തവണയും ഉണർവോടെ മുന്നേറുകയാണ്.
