പൊള്ളുന്ന ചൂടില്‍ ചായക്കും ചൂട് പിടിക്കുന്നു’ചായ വില കൂട്ടാനൊരുങ്ങി ഹോട്ടലുടമകള്‍

ചങ്ങരംകുളം:പാചകവാതക പ്രതിസന്ധിയില്‍ പിടിച്ച് നില്‍ക്കാനാവാതെ പ്രതിസന്ധിയിലായഹോട്ടലുടമകള്‍ ചായക്ക് വില കൂട്ടുന്നു.സാധാരണ ചെറുതും വലുതുമായ ഷോപ്പുകളില്‍ 10 രൂപക്ക് വിറ്റിരുന്ന ചായയാണ് 15 ലേക്ക് കുതിക്കാനോരുങ്ങുന്നത്.ഇതിനോടകം തന്നെ മിക്ക കടകളിലും ചായ 12നും 15നുമായി വില്‍പന തുടങ്ങി കഴിഞ്ഞു.നിലവിലെ പ്രതിസന്ധിയെ മറി കടക്കാന്‍ ചായയുടെ വില വര്‍ദ്ധിപ്പിക്കുകയല്ലാതെ മറ്റു വഴികളില്ലെന്നാണ് ഹോട്ടലുടകള്‍ പറയുന്നത്.എന്നാല്‍ വലിയ രീതിയില്‍ ചായ മാത്രം വില്‍പന നടത്തുന്ന ടീ ഷോപ്പുകളില്‍ മുന്നറിയിപ്പില്ലാതെ ചായ വില കൂട്ടുന്നത് കച്ചവടത്തെ ബാധിക്കുമോ എന്ന ആശങ്കയും ചിലര്‍ പങ്ക് വെക്കുന്നുണ്ട്.1900 രൂപ വരെ വിലയുണ്ടായിരുന്ന ഗ്യാസ് 3000 മുതല്‍ 4000 രൂപ വരെ വിലക്ക് കരിഞ്ചന്തയില്‍ വാങ്ങിയാണ് പല ഹോട്ടലുടമകളും കച്ചവടം തുടരുന്നത്.പലയിടത്തും ഹോട്ടലുകള്‍ പൂര്‍ണ്ണമായോ ഭാഗികമായോ അടഞ്ഞു തുടങ്ങിയിട്ടുണ്ട്.ചെറുകിട കടക്കാര്‍ പലരും വിറക് അടുപ്പിലേക്ക് മാറി കഴിഞ്ഞിട്ടുണ്ട്.മിക്ക ഹോട്ടലുകളും ചായക്കച്ചവടം നിര്‍ത്തി വച്ചിരിക്കുകയാണ്.ഹോട്ടലുകളില്‍ ഉച്ചയൂണും നിര്‍ത്തി തുടങ്ങി.പലരും വിറക് അടുപ്പ് ഉപയോഗിച്ച് വീട്ടില്‍ നിന്ന് ഭക്ഷണം പാകം ചെയ്താണ് ഹോട്ടലുകളില്‍ എത്തിച്ച് വില്‍പന തുടരുന്നത്.പ്രതിസന്ധി തുടര്‍ന്നാല്‍ മറ്റു ഭക്ഷണങ്ങള്‍ക്കും വില കൂട്ടാതെ മുന്നോട്ട് പോവാന്‍ കഴിയില്ലെന്നും തുറന്ന് പ്രവൃത്തിക്കുന്ന ഹോട്ടലുടമകള്‍ പറയുന്നു.