എടപ്പാൾ :ആസ്വാദകർ എന്ന നിലയിൽ പോലും വനിതാ പ്രാതിനിധ്യം കുറവുള്ള താള വാദ്യ കലാരംഗത്ത്,പൂർണമായും വനിതകൾ മാത്രമടങ്ങുന്ന പഞ്ചവാദ്യ സംഘം”മാത്രിക” മാർച്ച് 8 – ന്,അന്താരാഷ്ട്ര വനിതാ ദിനത്തിൽ അരങ്ങേറ്റം കുറിക്കും.8 വയസുള്ള കൊച്ചുകുട്ടി മുതൽ 74 വയസുള്ള അമ്മൂമമാർ വരെ അടങ്ങുന്ന
വനിതാ പഞ്ചവാദ്യ സംഘം ഒരുങ്ങുന്നത് സോപാനം ഡയറക്ടർ കൂടിയായ സന്തോഷ് ആലങ്കോടിൻ്റെ ശിക്ഷണത്തിലാണ്.മട്ടന്നൂർ ശങ്കരൻകുട്ടി മാരാർ, കരിയന്നൂർ നാരായണൻ നമ്പൂതിരി,കോട്ടക്കൽ രവി ഉൾപ്പെടെ മലയാള താളവാദ്യലോകത്തെ ആചാര്യന്മാർ മാർഗദർശനമരുളിക്കൊണ്ട് കൂടെയുണ്ട്.
രാവിലെ 9 മണി മുതൽ ചടങ്ങുകൾ ആരംഭിക്കും.പണി പൂർത്തിയാക്കിയ വാദ്യ കലാ പഠന കേന്ദ്രത്തിൻ്റെയും സഭാ മണ്ഡപത്തിൻ്റെയും കലകൾക്കായുള്ള ഗ്രന്ഥശാലയുടേയും ഉദ്ഘാടനവും മാർച്ച് 8-ന് നടക്കും. രാഷ്ട്രീയ സാമൂഹിക കലാ സാംസ്കാരിക രംഗത്തെ പ്രമുഖർ പിന്തുണയും പ്രോത്സാഹനവും അനുഗ്രഹവുമായി ചേരുന്നുണ്ട്. നാടകവും കഥകളിയുമുൾപ്പെടെ
പരിപാടികൾ ഇതിനോടനുബന്ധിച്ച് അരങ്ങേറുന്നുണ്ട്.
