വാഹനങ്ങളുടെ മലിനീകരണ നിയന്ത്രണ സർട്ടിഫിക്കറ്റ് (PUC) കാലാവധി കേന്ദ്രസർക്കാർ പരിഷ്കരിച്ചു.പുതിയ ബിഎസ്-6 (BS-VI) വാഹനങ്ങൾക്ക് കൂടുതൽ കാലാവധി അനുവദിക്കുകയും, പഴയ വാഹനങ്ങൾക്ക് ഇടവിട്ട് പരിശോധന നിർബന്ധമാക്കുകയും ചെയ്തു
നവംബർ 13-ന് റോഡ് ഗതാഗത, ഹൈവേ മന്ത്രാലയം (MoRTH) വിജ്ഞാപനം ചെയ്ത പുതിയ ചട്ടങ്ങൾ പ്രകാരം, ആറ് വർഷം വരെ പഴക്കമുള്ള സ്വകാര്യ ബിഎസ്-6 വാഹനങ്ങൾക്ക് മൂന്ന് വർഷത്തിലൊരിക്കൽ പി.യു.സി സർട്ടിഫിക്കറ്റ് മതിയാകും. ആറ് വർഷത്തിൽ കൂടുതലും 10 വർഷം വരെയുമുള്ള കാറുകൾക്ക് വാർഷിക പുതുക്കലും, 10 വർഷത്തിൽ കൂടുതൽ പഴക്കമുള്ള വാഹനങ്ങൾക്ക് ആറ് മാസത്തിലൊരിക്കൽ പുതുക്കലും ആവശ്യമാണ്.
കേന്ദ്രത്തിന്റെ പരിഷ്കരിച്ച പി.യു.സി കാലാവധി പട്ടിക രാജ്യവ്യാപകമായി ബാധകമാണ്; ഇത് ഡൽഹി സർക്കാരിന്റെ ശൈത്യകാല മലിനീകരണ നിയന്ത്രണ നടപടികളിൽ നിന്ന് വ്യത്യസ്തവുമാണ്. ദേശീയ തലസ്ഥാനത്ത് നവംബർ ഒന്ന് മുതൽ ഫെബ്രുവരി 28 വരെയുള്ള വാർഷിക ശൈത്യകാല കർമ്മപദ്ധതി സർക്കാർ നടപ്പാക്കിവരികയാണ്; മലിനീകരണ ചട്ടങ്ങളുടെ കർശന പരിശോധന, ‘പി.യു.സി ഇല്ലെങ്കിൽ ഇന്ധനമില്ല’ നയം, മലിനീകരണമുണ്ടാക്കുന്ന വാഹനങ്ങൾക്കുള്ള നിയന്ത്രണങ്ങൾ എന്നിവ ഇതിൽ ഉൾപ്പെടുന്നു.
ബിഎസ്-6 മാനദണ്ഡം പാലിക്കുന്ന ചരക്ക്-യാത്രാ (ട്രാൻസ്പോർട്ട്) വാഹനങ്ങൾക്കും പരിഷ്കരിച്ച പി.യു.സി ചട്ടങ്ങൾ കാലാവധി ദീർഘിപ്പിക്കുന്നുണ്ട്. ആറ് വർഷം വരെയുള്ളവയ്ക്ക് രണ്ട് വർഷത്തിലൊരിക്കൽ പുതുക്കൽ മതിയാകും; ആറ് വർഷത്തിൽ കൂടുതൽ എന്നാൽ 10 വർഷം വരെയുള്ള വാഹനങ്ങൾക്ക് വർഷം തോറും പുതുക്കണം. 10 വർഷത്തിൽ കൂടുതൽ പഴക്കമുള്ള ട്രാൻസ്പോർട്ട് വാഹനങ്ങൾക്ക് ആറ് മാസത്തിലൊരിക്കൽ പുതുക്കൽ തുടരും.
ബിഎസ്-1, ബിഎസ്-2, ബിഎസ്-3 എമിഷൻ മാനദണ്ഡങ്ങൾ പാലിക്കുന്ന വാഹനങ്ങൾക്ക് പി.യു.സി സർട്ടിഫിക്കറ്റിന്റെ കാലാവധി മൂന്ന് മാസമായിരിക്കും. ബിഎസ്-4 മാനദണ്ഡം പാലിക്കുന്നവയ്ക്ക് ആറ് മാസത്തെ കാലാവധിയായിരിക്കും ഉണ്ടാകുക.1988-ലെ മോട്ടോർ വാഹന നിയമത്തിന് കീഴിലുള്ള സെൻട്രൽ മോട്ടോർ വെഹിക്കിൾസ് (പതിനാറാം ഭേദഗതി) ചട്ടങ്ങൾ, 2026 വഴിയാണ് മാറ്റങ്ങൾ വിജ്ഞാപനം ചെയ്തത്; ഔദ്യോഗിക ഗസറ്റിൽ പ്രസിദ്ധീകരിച്ചതോടെ ഇവ പ്രാബല്യത്തിൽ വന്നു.
പുതുക്കിയ സർട്ടിഫിക്കറ്റുകൾ എപ്പോഴാണ് പ്രാബല്യത്തിൽ വരികയെന്നും ഭേദഗതി ചെയ്ത ചട്ടങ്ങൾ വ്യക്തമാക്കുന്നു. നിലവിലുള്ള സർട്ടിഫിക്കറ്റിന്റെ കാലാവധി അവസാനിക്കുന്നതിന് 10 ദിവസം മുമ്പ് പുതുക്കലിനായി അപേക്ഷിച്ചാൽ, മുമ്പത്തേതിന്റെ കാലാവധി അവസാനിക്കുന്ന തീയതി മുതൽ പുതിയ സർട്ടിഫിക്കറ്റ് പ്രാബല്യത്തിൽ വരും.സർട്ടിഫിക്കറ്റ് കാലഹരണപ്പെട്ട ശേഷം പുതുക്കാൻ അപേക്ഷിക്കുന്ന മറ്റെല്ലാ കേസുകളിലും, പുതുക്കുന്ന തീയതി മുതൽ പുതിയ സർട്ടിഫിക്കറ്റ് പ്രാബല്യത്തിൽ വരും.







