സൗദി അറേബ്യയില് ഉംറ തീര്ഥാടകര് സഞ്ചരിച്ച ബസ് മറിഞ്ഞ് രണ്ട് മലയാളികള് മരിച്ചു. റിയാദിന് സമീപം ഹൂത ബനീ തമീമില് നിന്ന് ഉംറയ്ക്ക് തിരിച്ച സംഘമാണ് അപകടത്തില്പ്പെട്ടത്. പത്തനാപുരം സ്വദേശിനി ഷീബ, സംഘത്തിന്റെ അമീറും നിലമ്പൂര് സ്വദേശിയുമായ ഇസ്മയില് എന്നിവരാണ് മരിച്ച മലയാളികള്.
ഉച്ചയ്ക്ക് ഒന്നരയോടെയായിരുന്നു ദാരുണമായ അപകടമുണ്ടായത്. ഏകദേശം 50 തീര്ഥാടകര് സഞ്ചരിച്ചിരുന്ന ബസ്, യാത്ര തുടങ്ങി 500 കിലോമീറ്റര് അകലെ മഹലൂമിയ എന്ന സ്ഥലത്തെത്തിയപ്പോഴാണ് അപകടത്തില്പ്പെട്ടത്. ബസിന്റെ പിന്വശത്തെ രണ്ട് ടയറുകള് ഒരേസമയം പൊട്ടിത്തെറിച്ചതോടെ നിയന്ത്രണം വിട്ട ബസ് എതിര്ദിശയിലുള്ള റോഡിലേക്ക് മറിയുകയായിരുന്നു. ബസിന്റെ മുകള്ഭാഗം തകരുകയും ആ വിടവിലൂടെ പുറത്തേക്ക് തെറിച്ചു വീണുമാണ് ഷീബയും ഇസ്മയിലും സംഭവസ്ഥലത്ത് വെച്ച് തന്നെ മരിച്ചത്. മരിച്ച ഷീബ വര്ഷങ്ങളായി ഭര്ത്താവിനൊപ്പം ഹൂത ബനീ തമീമില് താമസിച്ചുവരികയായിരുന്നു. അപകടത്തില് 18 പേര്ക്ക് പരിക്കേറ്റു, ഇതില് എട്ടുപേര് മലയാളികളാണ്
പരിക്കേറ്റവരെ വിവിധ ആശുപത്രികളില് പ്രവേശിപ്പിച്ചു. ഇതില് വയനാട് വെള്ളമുണ്ട സ്വദേശി ഹാരിസിന്റെ നില ഗുരുതരമാണ്. ഇദ്ദേഹം തായിഫ് ജനറല് ആശുപത്രിയില് ചികിത്സയിലാണ്. മലയാളികള്ക്ക് പുറമെ മറ്റു സംസ്ഥാനങ്ങളില് നിന്നുള്ളവരും ബംഗ്ലാദേശ് സ്വദേശികളും ബസിലുണ്ടായിരുന്നു. യാത്രയ്ക്കിടെ ബസിന്റെ ബ്രേക്കിന് തകരാര് കണ്ടതിനെ തുടര്ന്ന് വര്ക്ക്ഷോപ്പില് കാണിച്ച് പരിഹരിച്ച ശേഷമാണ് യാത്ര തുടര്ന്നത്. റമദാന് മാസമായതിനാല് മക്കയിലേക്ക് തീര്ഥാടകരുടെ വലിയ ഒഴുക്ക് തുടരുന്നതിനിടെയാണ് പ്രവാസി ലോകത്തെ കണ്ണീരിലാഴ്ത്തി ഈ അപകടം സംഭവിച്ചിരിക്കുന്നത്
