കേരളത്തിൽ എൽഡിഎഫ് ഭരണത്തുടർച്ച നേടുമെന്ന് മുൻ കേന്ദ്രമന്ത്രിയും മുതിർന്ന കോൺഗ്രസ് നേതാവുമായ മണിശങ്കർ അയ്യർ. പിണറായി വിജയൻ തന്നെ വീണ്ടും മുഖ്യമന്ത്രിയായി തുടരുമെന്നും പുതിയൊരു ഇന്ത്യയെക്കുറിച്ചുള്ള ഗാന്ധിജിയുടെ ദർശനം നടപ്പാക്കിയത് ഒരു കമ്മ്യൂണിസ്റ്റ് മാർക്സിസ്റ്റ് പാർട്ടിയാണ്. ഗാന്ധിജി സ്വപ്നം കണ്ട പുരോഗതി കൈവരിച്ച ഏക സംസ്ഥാനമാണ് കേരളമെന്നും അദ്ദേഹം അഭിപ്രായപ്പെട്ടു. എന്റെ പാർട്ടി സഹപ്രവർത്തകർ പരിപാടി ബഹിഷ്കരിച്ചതിൽ ഖേദിക്കുന്നുവെന്നും മണിശങ്കർ അയ്യർ വ്യക്തമാക്കി. രാജീവ് ഗാന്ധിയുടെ വികേന്ദ്രീകരണ ആശയങ്ങൾ ഏറ്റവും മികച്ച രീതിയിൽ നടപ്പിലാക്കിയത് കേരളമണെന്ന് വ്യക്തമാക്കിയ അദ്ദേഹം കോൺഗ്രസ് കൈവിട്ട ദൗത്യം ഇടത് സർക്കാർ ഏറ്റെടുക്കണമെന്നും ആവശ്യപ്പെട്ടു. വിഷൻ 2031: വികസനവും ജനാധിപത്യവും’ അന്താരാഷ്ട്ര സെമിനാറിൽ സംസാരിക്കുകയായിരുന്നു അദ്ദേഹം
നവകേരള നിർമ്മിതിക്കുള്ള പദ്ധതികൾ തയ്യാറാക്കുന്നതിന് വേണ്ടിയാണ് വിഷൻ 2031 അന്താരാഷ്ട്ര കോൺഫറൻസ് സംഘടിപ്പിച്ചത്. 2031 ആകുമ്പോൾ കേരളം ഏത് രീതിയിൽ മാറണമെന്നതാണ് പ്രധാനമായും ചർച്ചയായത്. കേരളത്തിലെ വികസന ഭൂപടം രചിക്കുന്നതിൽ ഈ യോഗം വലിയ പങ്ക് വഹിക്കുമെന്നാണ് വിഷൻ 2031 ഉദ്ഘാടനം ചെയ്തുകൊണ്ട് മുഖ്യമന്ത്രി പറഞ്ഞത്. ജാതി ജന്മി മേൽക്കോയ്മകൾ നിലനിന്നിരുന്ന നാടാണ് കേരളം. അവിടെ നിന്നാണ് ഇത്രയേറെ മാറിയ കേരളം ഉണ്ടായത്. പുതിയ കാലത്തിൻ്റെ ആവശ്യങ്ങൾക്കനുസരിച്ച് കേരളം സ്വയമേവ നവീകരിച്ചു. കേരളം പുതിയ മാതൃകകൾ ഉണ്ടാക്കുന്നു അതിന്റെ അടുത്ത കണ്ണിയാണ് നവകേരള നിർമിതിയെന്നും മുഖ്യമന്ത്രി വ്യക്തമാക്കി.
