മകളുടെ വിവാഹ ചടങ്ങില്‍ എത്തിയവര്‍ക്കെല്ലാം മരതൈകള്‍ വിതരണം ചെയ്ത് മരംമുറി തൊഴിലാളി

ചങ്ങരംകുളം:മകളുടെ വിവാഹ ചടങ്ങില്‍ എത്തിയവര്‍ക്കെല്ലാം മരതൈകള്‍ വിതരണം ചെയ്ത് മരംമുറി തൊഴിലാളി.ആലംകോട് സ്വദേശിയും മരംമുറി ജോലിക്കാരനുമായ ഹംസയാണ് തന്റെ മകള്‍ നാജിഹ യുടെ വിവാഹ ചടങ്ങില്‍ എത്തിയവര്‍ക്ക് മര തൈകള്‍ വിതരണം ചെയ്തത് മാതൃകാവിവാഹം സംഘടിപ്പിച്ചത്.കക്കിടിപ്പുറം കെസിസി ഓഡിറ്റോറിയത്തില്‍ നടന്ന ചടങ്ങില്‍ നവവധുവിന് തൈകള്‍ നല്‍കി ആലംകോട് ഗ്രാമപഞ്ചായത്ത് പ്രസിഡന്റ് മരതൈ വിതരണം ഉദ്ഘാടനം ചെയ്തു.ഗ്രാമപഞ്ചായത്ത് വൈസ് പ്രസിഡണ്ട് സുബൈര്‍,മറ്റു ഗ്രാമപഞ്ചായത്ത് അംഗങ്ങള്‍ ചടങ്ങില്‍ പങ്കെടുത്ത് ആശംസ അറിയിച്ചു.കഴിഞ്ഞ 10 വര്‍ഷത്തോളമായി പ്രദേശത്ത് മരങ്ങള്‍ മുറിച്ച് കൊടുക്കുന്ന ജോലി ചെയ്യുന്ന ഹംസ ഇതിനോടകം നിരവധി മരങ്ങള്‍ മുറിച്ച് മാറ്റിയിട്ടുണ്ട്.ജോലിയുടെ ഭാഗമാണെങ്കിലും മരങ്ങള്‍ മുറിച്ച് മാറ്റുന്നത് പലപ്പോഴും പ്രയാസം സൃഷ്ടിച്ചിരുന്നെന്നും ഇത് കൊണ്ടാണ് മകളുടെ വിവാഹദിനത്തില്‍ ഇത്തരം ഒരു പദ്ധതി ആസൂത്രണം ചെയ്തതെന്നും ഹംസ പറഞ്ഞു.തൊഴിലിനിടെ ഏറ്റവും കൂടുതല്‍ മുറിക്കേണ്ടി വന്ന പ്ളാവ്,മട്ടി,മാവ്,തുടങ്ങി വിവിധ ഇനം ഹൈബ്രീഡ് നാടന്‍ തൈകളാണ് വിതരണം ചെയ്തത്.1500 ഓളം പേര്‍ക്ക് തൈകള്‍ നല്‍കിയതായും മുറിച്ച് മാറ്റിയത് ഇവിടെ തന്നെ വളര്‍ന്ന് പന്തലിക്കട്ടെ എന്നും ഹംസ പറയുന്നു