ഫാസ്ടാഗിൽ പണമില്ല; കെഎസ്ആർടിസി ബസ് ടോൾപ്ലാസയിൽ കുടുങ്ങി

പാലിയേക്കര∙ ഫാസ്ടാഗിൽ പണം ഇല്ലാത്തതിനെത്തുടർന്ന് കെഎസ്ആർടിസി ബസ് ടോൾപ്ലാസയിൽ കുടുങ്ങി. യാത്രക്കാർ അരമണിക്കൂറിലേറെ സമയം പെരുവഴിയിലായി. ഇന്നലെ രാത്രി എട്ടുമണിയോടെയായിരുന്നു സംഭവം. പിന്നീട് അതുവഴി വന്ന മറ്റു കെഎസ്ആർടിസി ബസുകളിൽ യാത്രക്കാരെ കയറ്റിവിട്ടു. ബസിൽ ഫാസ്ടാഗ് ഉണ്ടായിരുന്നെങ്കിലും പ്രവർത്തിച്ചിരുന്നില്ലെന്നു ടോൾപ്ലാസ അധികൃതർ പറഞ്ഞു. ചാലക്കുടി ഡിപ്പോയിലേതാണ് ബസ്. തൃശൂർ ഭാഗത്തേക്ക് യാത്ര ചെയ്തിരുന്ന ബസ് ടോൾ ബൂത്തിൽ തടഞ്ഞിട്ടതോടെ യാത്രക്കാരെ വഴിയിൽ ഇറക്കി ബസ് തിരിച്ചു പോയി. കേടായ ബസിനു പകരം ക്രമീകരിച്ച ബസ് ആയിരുന്നു ഇതെന്ന് കെഎസ്ആർടിസി അധികൃതരും പറഞ്ഞു.