ചെല്‍സി- ആഴ്‌സണല്‍ ലണ്ടന്‍ ഡെര്‍ബി ബലാബലം; ഗണ്ണേഴ്‌സിന്റെ ഗോള്‍വരള്‍ച്ചക്ക് അവസാനം

ലണ്ടന്‍ ഡെര്‍ബിയില്‍ സമനിലയില്‍ പിരിഞ്ഞ് ചെല്‍സിയും ആഴ്‌സണലും. ചുവപ്പും നീലയുമായി ഇളകിമറിഞ്ഞ സ്റ്റാംഫോര്‍ഡ് ബ്രിഡ്ജ് സ്‌റ്റേഡിയത്തിന് മികച്ച കാഴ്ചാവിരുന്ന് സമ്മാനിക്കാന്‍ ഇരുടീമുകള്‍ക്കും സാധിച്ചു. 1-1 എന്ന സ്‌കോറിലാണ് മത്സരം പിരിഞ്ഞത്.5-4-2 എന്ന ഫോര്‍മാറ്റിലാണ് ഇരുടീമുകളും കളിച്ചത്. ആദ്യ പകുതി ഗോള്‍രഹിത സമനിലയില്‍ പിരിഞ്ഞു. 60ാം മിനിറ്റില്‍ ഗബ്രിയേല്‍ മാര്‍ട്ടിനെല്ലിയിലൂടെ ആഴ്‌സണലാണ് ആദ്യ ഗോള്‍ നേടിയത്. പരുക്കില്‍ നിന്ന് മുക്തനായി എത്തിയ മാര്‍ട്ടി ഒദെഗാര്‍ദ് ആണ് ഗോളിന് അവസരമൊരുക്കിയത്.പത്ത് മിനിറ്റ് പിന്നിട്ടപ്പോഴേക്കും പെട്രോ നെറ്റോയിലൂടെ ചെല്‍സി സമനില പിടിച്ചു. സബ് ആയി ഇറങ്ങിയ ലിയാന്‍ഡ്രോ ട്രോസ്സാര്‍ഡ് രണ്ട് സുവര്‍ണാവസരങ്ങള്‍ പാഴാക്കി. അവസാന വിസിലിന് തൊട്ടുമുമ്പായിരുന്നു ഈ അവസരങ്ങള്‍.