സംഭരിച്ച നെല്ലിന്റെ പണം മാസങ്ങള്‍ കഴിഞ്ഞിട്ടും ലഭിക്കുന്നില്ല’പ്രതിഷേധവുമായി പൊന്നാനി കോള്‍ സംരക്ഷണ സമിതി രംഗത്ത്

ചങ്ങരംകുളം:സപ്ളൈകോ സംഭരിച്ച നെല്ലിന്റെ പണം കര്‍ഷകര്‍ക്ക് യഥാസമയം ലഭിക്കുന്നില്ലെന്നാരോപിച്ച് പൊന്നാനി കോള്‍മേഖലയിലെ കര്‍ഷകര്‍ രംഗത്ത്.മാസങ്ങള്‍ കഴിഞ്ഞിട്ടും നൂറ് കണക്കിന് വരുന്ന കര്‍ഷകര്‍ക്ക് പണം നല്‍കാത്ത നടപടിയില്‍ പ്രതിഷേധിച്ച് കര്‍ഷകരുടെ നേതൃത്വത്തില്‍ ജൂലായ് ഒന്നിന് പെരുമ്പടപ്പ് എഡിഎ ഓഫീസിലേക്ക് പ്രതിഷേധ മാര്‍ച്ചും ധര്‍ണ്ണയും സംഘടിപ്പിക്കുമെന്ന് പൊന്നാനി കോള്‍ സംരക്ഷണ സമിതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.സംഭരിച്ച നെല്ലിന് പിആര്‍എസ് അടിച്ച് നല്‍കിയതിന് ശേഷവും വെരിഫിക്കേഷന്റെ പേരില്‍ പണം നല്‍കാതെ കര്‍ഷകരെ ദുരിതത്തിലാക്കുകയാണ്. എല്ലാ വര്‍ഷവും നെല്ലിന്റെ പണം ലഭിക്കാന്‍ സമരം ചെയ്യേണ്ട അവസ്ഥയിലാണ് നെല്‍കര്‍ഷകര്‍.കൃഷി ഇറക്കുന്നതിന്റെയും കൊയ്ത് തുടങ്ങുന്നതിന്റെയും സമയം ഉദ്ധ്യോഗസ്ഥര്‍ക്ക് കൃത്യമായി അറിയുന്നതാണെന്നും നെല്ലിന്റെ പണം കൃത്യമായി ലഭിക്കാതിന് കാരണം ഉദ്ധ്യോഗസ്ഥരുടെ അനാസ്ഥയാണെന്നും സപ്ളൈകോയും ബന്ധപ്പെട്ട ഉദ്ധ്യോഗസ്ഥരും കര്‍ഷകരോട് കാണിക്കുന്ന അനാസ്ഥ അവസാനിപ്പിക്കണമെന്നും ആവശ്യപ്പെട്ടാണ് പൊന്നാനി കോള്‍സംരക്ഷണ സമിതി പ്രതിഷേധവുമായി രംഗത്തിറങ്ങുന്നതെന്നും ഭാരവാഹികള്‍ പറഞ്ഞു.ഭാരവാഹികളായ എന്‍കെ സതീഷന്‍,വിവി കരുണാകരന്‍,കെഎ ജയാനന്ദന്‍,എടി അബ്ദുല്‍ജബ്ബാര്‍,ഉമ്മര്‍ വിപി തുടങ്ങിയവര്‍ വാര്‍ത്താസമ്മേളനത്തില്‍ പങ്കെടുത്തു