ചങ്ങരംകുളം :തിരുവനന്തപുരം സി എച്ഛ് സെന്ററിന് വേണ്ടി ആലങ്കോട് പഞ്ചായത്ത് മുസ്ലിം ലീഗ് കമ്മിറ്റി ശാഖാ ലീഗ് കമ്മിറ്റികളുടെ സഹകരണത്തോടെ ഈ വർഷം സ്വരൂപിച്ച ഫണ്ട് പഞ്ചായത്ത് മുസ്ലിം ലീഗ് പ്രസിഡണ്ട് എം കെ അൻവർ തിരുവനന്തപുരം സി എച്ഛ് സെന്റർ ഭാരവാഹികൾക്ക് കൈമാറി. തിരുവനന്തപുരം സി എഛ് സെന്റർ ജനറൽ ബോഡി അംഗവും വേങ്ങര ബ്ലോക്ക്‌ പഞ്ചായത്ത് മെമ്പറുമായ അബ്ദുൽ അസീസ്, തിരുവനന്തപുരം സി എച്ഛ് സെന്റർ അസിസ്റ്റന്റ് മാനേജർ ഫത്താഹ് എന്നിവർ ചേർന്ന് ഫണ്ട് ഏറ്റു വാങ്ങി. ആലങ്കോട് പഞ്ചായത്ത് മുസ്ലിം ലീഗ് ജനറൽ സെക്രട്ടറി ഉമ്മർ തലാപ്പിൽ, സെക്രട്ടറി അഹമ്മദുണ്ണി കാളാച്ചാൽ, മുസ്ലിം യൂത്ത് ലീഗ് പൊന്നാനി മണ്ഡലം വൈസ് പ്രസിഡന്റ്‌ ഫവാസ് കിഴിക്കര, ചങ്ങരംകുളം മേഖല മുസ്ലിം ലീഗ് ഓഫീസ് സെക്രട്ടറി കെ ടി അബ്ദുൽ ലത്തീഫ് എന്നിവർ പങ്കെടുത്തു.
തിരുവനന്തപുരം റീജിയണൽ കാൻസർ സെന്ററിലും ശ്രീ ചിത്ര ഹോസ്പിറ്റലിലും ചികിത്സക്കായി എത്തുന്ന രോഗികൾക്ക് സൗജന്യ ഭക്ഷണം, താമസം, ആംബുലൻസ് സേവനം, രക്തദാനം, വളണ്ടിയർ സേവനം, നിർധനരായ രോഗികൾക്ക് ധനസഹായം തുടങ്ങി നിരവധി സേവനങ്ങൾ നൽകിവരുന്ന കേന്ദ്രമാണ് സി എച്ഛ് സെന്റർ. 2008 ൽ പ്രവർത്തനം തുടങ്ങിയ സി എച്ഛ് സെന്ററിൽ നിലവിൽ ഇരുന്നൂറ്റി അമ്പതോളം രോഗികൾക്കും കൂട്ടിരിപ്പുകാർക്കും താമസിക്കാനുള്ള സൗകര്യം ഉണ്ട്. 15 വയസ്സിൽ താഴെയുള്ള ക്യാൻസർ രോഗികൾക്ക് താമസിക്കുന്നതിനുള്ള പുതിയ കെട്ടിടത്തിന്റെ നിർമാണം നടന്നു വരുന്നു.
