ചങ്ങരംകുളത്ത് തിരക്കേറിയ ജംഗ്ഷനില്‍ റോഡ് പൊളിച്ചു ‘പ്രതിഷേധവുമായി വ്യാപാരികളും നാട്ടുകാരും

ചങ്ങരംകുളം:തിരക്കേറിയ ജംഗ്ഷനില്‍ മുന്നറിയിപ്പില്ലാതെ റോഡ് പൊളിക്കുന്നത് വ്യാപാരികളും നാട്ടുകാരും ചേര്‍ന്ന് തടഞ്ഞു.തിരക്കേറിയ ചങ്ങരംകുളം അങ്ങാടിയിലെ പ്രധാന റോഡാണ് കാലത്ത് മുതല്‍ പൊളിക്കാന്‍ തുടങ്ങിയത്‌.ജലജീവന്‍ പദ്ധതിക്കായി പുതിയ പൈപ്പുകള്‍ സ്ഥാപിക്കുന്നതിനാണ് റോഡ് പൊളിച്ചത്.തിരക്കില്ലാത്ത രാത്രി സമയങ്ങളില്‍ റോഡ് പൊളിക്കണമെന്നാവശ്യപ്പെട്ടാണ് നാട്ടുകാരും വ്യാപാരികളും പ്രതിഷേധവുമായി രംഗത്ത് എത്തിയത്.ഓട്ടോ തൊഴിലാളികളും ചുമട്ട് തൊഴിലാളികളും പ്രതിഷേധവുമായി എത്തിയതോടെ താല്‍കാലികമായി പ്രവൃത്തി നിര്‍ത്തി.പദ്ധതിക്ക് എതിരല്ലെന്നും ജനങ്ങളുടെയും യാത്രക്കാരുടെയും സുരക്ഷ കണക്കിലെടുക്കാതെ ജനത്തിരക്കേറിയ പാത പൊളിക്കുന്നത് വലിയ പ്രയാസങ്ങള്‍ സൃഷ്ടിക്കുമെന്നും തിരക്കില്ലാത്ത സമയങ്ങള്‍ നോക്കി പ്രവൃത്തി ചെയ്യുന്നതിനുള്ള എല്ലാ സൗകര്യങ്ങളും ഒരുക്കി കൊടുക്കാന്‍ തയ്യാറാണെന്നും വ്യാപാരി വ്യവസായി ഏകോപനസമിതി ചങ്ങരംകുളം യൂണിറ്റ് നേതാക്കള്‍ പറഞ്ഞു.റോഡ് പൊളിച്ച് പൂര്‍വ്വ സ്ഥിതിയിലാക്കാതെ മണ്ണിട്ട് മൂടി പോകുന്ന അവസ്ഥ തുടര്‍ന്നാല്‍ പൊതുജനങ്ങളെ സംഘടിപ്പിച്ച് പ്രതിഷേധങ്ങള്‍ സംഘടിപ്പിക്കുമെന്നും വ്യാപാരികള്‍ പറഞ്ഞു