പാറശ്ശാല ബൈപ്പാസിൽ അശ്രദ്ധമായി തുറന്ന കാർ ഡോറിൽ ബൈക്ക് ഇടിച്ചുണ്ടായ അപകടത്തിൽ 18-കാരന് ദാരുണാന്ത്യം. കത്തിപ്പാറ കരിപ്പുവാലി സ്വദേശി സോനു ആണ് മരിച്ചത്. മാതാപിതാക്കൾക്കും ബന്ധുവായ ബിനോയിയോടൊപ്പം ഒരു വിവാഹ ചടങ്ങിൽ പങ്കെടുത്ത് വീട്ടിലേക്ക് മടങ്ങുന്നതിനിടെയായിരുന്നു അപകടം
കത്തിപ്പാറ കരിപ്പുവാലി സ്വദേശി ഷാജിയുടേയും സിന്ധുവിന്റേയും മകനാണ് സോനു. മാതാപിതാക്കൾ ഒരു ബൈക്കിലും ബിനോയിയോടൊപ്പം മറ്റൊരു ബൈക്കിലുമായിരുന്നു ഇവർ മടങ്ങിയത്.
ബൈപ്പാസിൽ നിർത്തിയിട്ടിരുന്ന കാറിൻറെ ഡ്രൈവർ അശ്രദ്ധമായി ഡോർ തുറന്നപ്പോഴായിരുന്നു അപകടം. ബൈക്കിന്റെ പിൻസീറ്റിൽ ഇരിക്കുകയായിരുന്ന സോനുവിന് തെറിച്ചുവീണ് ഗുരുതരമായി പരിക്കേറ്റു. പാറശ്ശാല താലൂക്ക് ആശുപത്രിയിൽ എത്തിച്ചെങ്കിലും മരണം സ്ഥിരീകരിക്കുകയായിരുന്നു. മൃതദേഹം പാറശാല താലൂക്ക് ആശുപത്രി മോർച്ചറിയിലാണ്.
