ദാ വീണ്ടും മോഹൻലാൽ! എമ്പുരാന്റെ റെക്കാർഡ് 24 മണിക്കൂറിൽ തകർത്ത് ‘തുടരും’

റെക്കാർഡുകൾ തകർത്ത് മോഹൻലാൽ ചിത്രം ‘തുടരും’. ഇൻഡസ്ട്രി ഹിറ്റായ എമ്പുരാനെ ഞെട്ടിക്കുന്ന ബുക്കിംഗാണ് ചിത്രത്തിന് വിവിധ ഓൺലെെൻ ബുക്കിംഗ് ആപ്പുകളിൽ ലഭിക്കുന്നത്. റിലീസ് ചെയ്ത ശേഷം, ബുക്ക്‌മെെഷോ വഴിയുള്ള ആദ്യ ദിവസത്തെ ബുക്കിംഗിൽ മലയാളസിനിമയിലെ ഒന്നാം സ്ഥാനം സ്വന്തമാക്കിയിരിക്കുകയാണ് ‘തുടരും’. നാലുലക്ഷത്തിൽ കൂടുതൽ ടിക്കറ്റുകളാണ് വിറ്റഴിഞ്ഞിരിക്കുന്നത്. എമ്പുരാൻ റിലീസിന് ശേഷം മൂന്ന് ലക്ഷം ടിക്കറ്റുകളായിരുന്നു വിറ്റത്. വമ്പൻ ഹെെപ്പിലും വലിയ ബഡ്ജറ്റിലും പാൻ ഇന്ത്യൻ പ്രമോഷനുമായി എത്തിയ എമ്പുരാന്റെ റെക്കാർഡ് തകർത്താണ് തുടരും ബുക്ക് മെെഷോയിൽ മലയാള സിനിമയിൽ പുതിയ ചരിത്രം സൃഷ്ടിച്ചിരിക്കുന്നത്.മോഹൻലാൽ, ശോഭന എന്നിവരെ പ്രധാന കഥാപാത്രങ്ങളാക്കി തരുൺ മൂർത്തിയാണ് തുടരും സംവിധാനം ചെയ്തിരിക്കുന്നത്. മോഹൻലാലും ശോഭനയും വർഷങ്ങൾക്ക് ശേഷം ഒന്നിക്കുന്ന ചിത്രം കൂടിയാണ് തുടരും. 2009ൽ റിലീസ് ചെയ്ത സാഗർ ഏലിയാസ് ജാക്കി റീലോഡഡ് എന്ന ചിത്രമാണ് ഇരുവരും അവസാനം ഒരുമിച്ച് അഭിനയിച്ചത്. ഫാമിലി ഡ്രാമ ഗണത്തിൽപെടുന്ന തുടരും സിനിമയിൽ സാധാരണക്കാരനായ ടാക്സി ഡ്രൈവറുടെ വേഷമാണ് മോഹൻലാൽ അവതരിപ്പിക്കുന്നത്.മണിയൻപിള്ള രാജു, ബിനു പപ്പു, ഫർഹാൻ ഫാസിൽ, തോമസ് മാത്യു, ആർഷ ചാന്ദ്‌നി, ബൈജു, ഇർഷാദ് തുടങ്ങിയവരാണ് മറ്റു താരങ്ങൾ. തരുൺ മൂർത്തിയും കെ.ആർ. സുനിലും ചേർന്നാണ് തിരക്കഥ. ഛായാഗ്രഹണം ഷാജികുമാർ, ശബ്ദലേഖനം വിഷ്ണു ഗോവിന്ദ്, രജപുത്ര വിഷ്വൽ മീഡിയയുടെ ബാനറിൽ എം. രഞ്ജിത്ത് ആണ് നിർമ്മാണം.