ശ്രദ്ധിക്കണേ! മെയ് 1 മുതൽ എടിഎമ്മുകളിൽ നിന്ന് പണം പിൻവലിക്കുന്നതിന് ചെലവ് കൂടും

മെയ് 1 മുതൽ എടിഎമ്മുകളിൽ നിന്ന് പണം പിൻവലിക്കുന്നതിന് ചെലവേറും. എടിഎം ഇടപാടുകൾക്ക് ബാധകമായ ഇന്റർചേഞ്ച് ഫീസ് വർധിപ്പിക്കാൻ റിസർവ് ബാങ്ക് (RBI) അംഗീകാരം നൽകിയതോടെയാണിത്. സാമ്പത്തിക ഇടപാടുകൾക്കുള്ള എടിഎം ഇന്റർചേഞ്ച് ഫീസ് 2 രൂപയും സാമ്പത്തികേതര ഇടപാടുകൾക്ക് 1 രൂപയും വർധിപ്പിക്കാൻ റിസർവ് ബാങ്ക് അംഗീകാരം നൽകിയതായി മാധ്യമങ്ങൾ റിപ്പോർട്ട് ചെയ്തു. ഇതോടെ, പണം പിൻവലിക്കൽ ഫീസ് ഒരു ഇടപാടിന് 17 രൂപയിൽ നിന്ന് 19 രൂപയായും ബാലൻസ് ചെക്ക് ഫീസ് ഒരു ഇടപാടിന് 6 രൂപയിൽ നിന്ന് 7 രൂപയായും ഉയരും.മറ്റ് ബാങ്കുകളുടെ എടിഎമ്മുകൾ പതിവായി ഉപയോഗിക്കുന്ന ഉപഭോക്താക്കളെ ഇത് ബാധിക്കും, കാരണം അവരുടെ പിൻവലിക്കൽ ചെലവ് വർധിക്കും.എന്താണ് എടിഎം ഇന്റർചേഞ്ച് ഫീസ്?എടിഎം സേവനങ്ങൾ ഉപഭോക്താക്കൾക്ക് നൽകുന്നതിന് ഒരു ബാങ്ക് മറ്റൊരു ബാങ്കിന് നൽകുന്ന ചാർജാണ് എടിഎം ഇന്റർചേഞ്ച് ഫീസ്. ബാങ്കിംഗ് ചെലവുകളുടെ ഭാഗമായി ഇന്റർചേഞ്ച് ഫീസ് സാധാരണയായി ഉപഭോക്താക്കൾക്ക് കൈമാറുന്നു.അതായത്, ഒരു ബാങ്കിലെ ഉപഭോക്താവ് മറ്റൊരു ബാങ്കിന്റെ ഉടമസ്ഥതയിലുള്ള ഒരു എടിഎമ്മിൽ നിന്ന് പണം പിൻവലിച്ചാൽ, സൗജന്യ പ്രതിമാസ പരിധി കവിഞ്ഞതിന് ശേഷം അവരുടെ ബാങ്ക് അവരിൽ നിന്ന് പണം ഈടാക്കും. മെട്രോ നഗരങ്ങളിൽ അഞ്ച് ഇടപാടുകളും മെട്രോ ഇതര നഗരങ്ങളിൽ മൂന്ന് ഇടപാടുകളുമാണ് സൗജന്യമായുള്ളത്.വൈറ്റ്-ലേബൽ എടിഎം ഓപ്പറേറ്റർമാർ വർധനവിനായി ലോബിയിംഗ് നടത്തിയിരുന്നതിനാൽ നാഷണൽ പേയ്‌മെന്റ്സ് കോർപ്പറേഷൻ ഓഫ് ഇന്ത്യ (എൻ‌പി‌സി‌ഐ) മുന്നോട്ടുവച്ച നിർദ്ദേശത്തിന്റെ അടിസ്ഥാനത്തിലാണ് ആർ‌ബി‌ഐ പരിഷ്കരണം. പ്രവർത്തനച്ചെലവ് കണക്കിലെടുക്കുമ്പോൾ പഴയ ഫീസ് പര്യാപ്തമല്ലെന്ന് അവർ വാദിച്ചു.പരിമിതമായ അടിസ്ഥാന സൗകര്യങ്ങൾ കാരണം മറ്റ് ബാങ്കുകളുടെ എടിഎം ശൃംഖലകളെ വളരെയധികം ആശ്രയിക്കുന്നതിനാൽ ഉയർന്ന ഫീസ് ചെറിയ ബാങ്കുകളെ ബാധിക്കും.