കർഷക കോർഡിനേഷൻ കമ്മിറ്റി കൺവെൻഷനും മുതിർന്ന കർഷകനെ ആദരിക്കലും നടന്നു

ചാലിശ്ശേരി :ചാലിശ്ശേരി ഗ്രാമപ്പഞ്ചായത്തിൽ
12 പാടശേഖരങ്ങളിലേയും കർഷകർ ഉൾപ്പെടുന്ന പാടശേഖര കോർഡിനേഷൻ സമിതി കൺവെൻഷനും
മുതിർന്ന കർഷകനെ ആദരിക്കലും ഇഫ്താർ സംഗമവും സംഘടിപ്പിച്ചു. ചാലിശ്ശേരി പഞ്ചായത്തിലെ
കർഷക കൂട്ടായ്മയായ കർഷക കോർഡിനേഷൻ സമിതി സംഘടിപ്പിച്ച കൺവെൻഷനിൽ ചാലിശ്ശേരി പഞ്ചായത്തിലെ നിലവിലുള്ള കാർഷിക രീതികളെക്കുറിച്ചും കർഷകർ നേരിടുന്ന പ്രതിസന്ധികളെകുറിച്ചും ചർച്ചയും നടന്നു. 12 പാടശേഖരസമിതികളെ പ്രതിനിധീകരിച്ച് പങ്കെടുത്ത കർഷകർ കാർഷിക അഭിവൃദ്ധിക്ക് ആവശ്യമായ നിർദ്ദേശങ്ങളും അഭിപ്രായങ്ങളും യോഗത്തിൽ രേഖപ്പെടുത്തി.കോർഡിനേഷൻ കമ്മിറ്റി സെക്രട്ടറി പി.ബി.സുനിൽകുമാർ കൺവെൻഷൻ ഉദ്ഘാടനം ചെയ്തു. പ്രസിഡന്റ് മോഹനൻ പൊന്നുള്ളി അധ്യക്ഷനായി.മുതിർന്ന കർഷക കാരണവരും പാടശേഖര സമിതിയുടെ ഭാരവാഹിയുമായ ഹനീഫയെ ചടങ്ങിൽ ആദരിച്ചു.അടുത്ത വർഷത്തെ കൃഷികൂടുതൽ മെച്ചപ്പെട്ട രീതിയിൽ നടത്തുന്നതിന് ആവശ്യമായ നിർദ്ദേശങ്ങളും കർഷകർ പരസ്പരം പങ്കുവെച്ചു. കർഷകർക്ക് കൃഷി നടത്തുന്നതിന് തടസ്സമായി നിൽക്കുന്ന മയിൽ, കാട്ടുപന്നി തുടങ്ങിയവയുടെ ഉപദ്രവം ഇല്ലാതായി കിട്ടുന്നതിന് അധികൃതരുടെ ഭാഗത്തുനിന്ന് ആവശ്യമായ ഇടപെടലുകൾ ഉണ്ടാവണമെന്ന് കൺവെൻഷൻ ആവശ്യപ്പെട്ടു.പാടശേഖരങ്ങളിലെ കൊയ്ത്തുകൾ കഴിയുന്ന മുറക്ക് തന്നെ നെല്ലെടുപ്പ് നടത്തുന്നതിന് സപ്ലൈകോ ആവശ്യമായ നടപടികൾ സ്വീകരിക്കണമെന്നും സമ്മേളനം ആവശ്യപ്പെട്ടു.കൺവെൻഷന് ശേഷം കർഷകരുടെ നേതൃത്വത്തിൽ ഇഫ്താർ സംഗമവും നടത്തി.ട്രഷറർ എം.എം.എ ജലീൽ,ഹരി വേറൂർ,ബാബു പ്രയാഗ,സെയ്ത് മുഹമ്മദ്,ഋഷഭദേവൻ നമ്പൂതിരി,മൂലക്കാട് പ്രദീപ്,ഹനീഫ, മാധ്യമപ്രവർത്തകരായ സി.മൂസ പെരിങ്ങോട്,പ്രദീപ് ചെറുവാശ്ശേരി എന്നിവർ സംസാരിച്ചു.