മാറഞ്ചേരി:മാറഞ്ചേരി പഞ്ചായത്തിലെ ഏക ഉല്ലാസ പാർക്കായ ബിയ്യം പാർക്ക് അറ്റകുറ്റപ്പണികൾക്കായി അടച്ചിട്ടിട്ട് 6 മാസമാകുന്നു.അപകടകരാംവിധം തുരുമ്പെടുത്ത കുട്ടികളുടെ റൈഡുകളുടെ അറ്റകുറ്റപ്പണികൾ നടത്തുന്നതിന്നാണ് ജില്ലാ ടൂറിസം വകുപ്പിന് കീഴിലുള്ള പാർക്ക് കഴിഞ്ഞ വർഷം സെപ്റ്റമ്പറിൽ അടക്കുന്നത്.ദീർഘകാലമായി സന്നദ്ധ സംഘടനകളും നാട്ടുകാരും ആവശ്യപ്പെട്ടാണ് വളരെ വൈകി അറ്റകുറ്റപ്പണികൾ നടത്തുന്നതിന് ഡി.റ്റി.പി.സി. തയ്യാറായത്.അറ്റകുറ്റപ്പണികൾ നടത്തുന്നതിന് 6 ലക്ഷം രൂപക്കാണ് കരാർ നൽകിയിരുന്നത്.
രണ്ട് മാസം കൊണ്ട് അറ്റകുറ്റപ്പണി പൂർത്തിയായിട്ടും പാർക്ക് തുറന്ന് കൊടുക്കാൻ അധികൃതർ തയ്യാറായിട്ടില്ല.പാർക്കിലെ പ്രവേശനം ടിക്കറ്റ് വെച്ച് ആക്കുന്നതിന് പുറമെയുള്ള കരാറുകാർക്ക് ടെണ്ടർ കൊടുത്തിരിക്കുന്നത് കൊണ്ടാണ് പാർക്ക് തുറക്കാൻ വൈകുന്നതെന്നാഞ്ഞ് അധികൃതർ പറയുന്നത്.
നിലവിൽ ഒരു റൈഡും പുതുതായി കൊണ്ട് വരാതെയും പാർക്കിൻ്റെ സൗകര്യങ്ങൾ വർദ്ധിപ്പിക്കാതെയുമാണ് പ്രവേശന ഫീസ് ഏർപെടുത്താൻ ജില്ലാ ടൂറിസം വകുപ്പ് ശ്രമിക്കുന്നത്. ബിയ്യം കായലോരത്ത് ലക്ഷങ്ങൾ ചെലവഴിച്ച് എം.പി. ഫണ്ടിൽ നിന്ന് നിർമ്മിച്ച ഓപ്പൺഹെൽത്ത് പാർക്ക് ജനങ്ങൾക്ക് വേണ്ടി കഴിഞ്ഞ ദിവസം തുറന്ന് കൊടുത്തിരുന്നു.പാർക്കിൽ പ്രവേശന ഫീസ് ഈടാക്കാനുള്ള അധികൃതരുടെ നീക്കത്തിനെതിരെ ശക്തമായ പ്രക്ഷോഭം നടത്താൻ നാട്ടുകാരും സന്ന സംഘടനകളും തയ്യാറെടുക്കുകയാണ്.
ബിയ്യം പാർക്കിൽ പ്രവേശന ഫീസ് ഏർപ്പെടുത്താനുള്ള നീക്കം ഉപേക്ഷിക്കുക:പൗരാവാകാശ സംരക്ഷണ സമിതി.
മാറഞ്ചേരി: 6 ലക്ഷം രൂപ മാത്രം ചെലവഴിച്ച് നിലവിലുള്ള ഏതാനും റൈഡുകൾ അറ്റകുറ്റപ്പണി നടത്തിയതിൻ്റെ പേരിൽ പ്രവേശന ഫീസ് ഈടാക്കാനുള്ള നീക്കം ഉപേക്ഷിക്കണമെന്നും അല്ലങ്കിൽ വിവിധ ജനകീയ കൂട്ടായ്മകളെ പങ്കെടുപ്പിച്ച് ജനകീയ പ്രക്ഷോപങ്ങൾ സംഘടിപ്പിക്കുമെന്നും മാറഞ്ചേരി പൗരാവകാശ സംരക്ഷണ സമിതി തീരുമാനിച്ചു. മാറഞ്ചേരി പഞ്ചായത്തിലെ ഏക ഉല്ലാസ പാർക്കായ ബിയ്യം പാർക്കിൻ്റെ നടത്തിപ്പ് ഗ്രാമ പഞ്ചായത്ത് ഏറ്റെടുക്കണമെന്നും സമിതി ആവശ്യപ്പെട്ടു. അറ്റകുറ്റപ്പണി കഴിഞ്ഞിട്ട് അഞ്ച് മാസം കഴിഞ്ഞിട്ടും പാർക്ക് തുറക്കാതിരിക്കുന്നതിൽ പഞ്ചായത്തോ ജനപ്രതിനിധികളോ ഇടപെടാത്തതിലും സമിതി പ്രതിഷേധം രേഖപ്പെടുത്തി. പ്രസിഡൻ്റ് അഡ്വ. എം. എ. എം. റഫീഖ് അധ്യക്ഷത വഹിച്ചു. ജനറൽ സെക്രട്ടറി എ. അബ്ദുൾ ലത്തീഫ് റിപ്പോർട്ട് അവതരിപ്പിച്ചു. എം.ടി. നജീബ്, കരീം ഇല്ലത്തേൽ, അശ്റഫ് പൂച്ചാമം, മുഹമ്മദുണ്ണി , എൻ. കെ. റഹീം എന്നിവർ പ്രസംഗിച്ചു.
