രഹസ്യ വിവരത്തിന്‍റെ അടിസ്ഥാനത്തിൽ പരിശോധന; ട്രെയിൻ മാർഗ്ഗം കടത്തി കൊണ്ടുവന്ന കഞ്ചാവുമായി രണ്ട് പേർ അറസ്റ്റിൽ

മലപ്പുറം: വെസ്റ്റ് ബംഗാളിൽ നിന്നും ട്രെയിൻ മാർഗ്ഗം കടത്തി കൊണ്ടുവന്ന 2 കിലോ കഞ്ചാവുമായി ഇതര സംസ്ഥാന തൊഴിലാളികളായ രണ്ട് പേര്‍ അറസ്റ്റിൽ. സി ഐ വിനോദ് വലിയാട്ടൂരിൻ്റെ നേതൃത്വത്തിൽ ഡാൻസാഫ് ടീമാണ് അറസ്റ്റ് ചെയ്തു. വെസ്റ്റ് ബംഗാൾ ബർദമാൻ സ്വദേശികളായ സൂരജ് മൊണ്ടൽ (29), ഇസ്മയിൽ മൊണ്ടൽ (24) എന്നിവരെയാണ് അറസ്റ്റ് ചെയ്തത്. ഇതര സംസ്ഥാന തൊഴിലാളികൾ മുഖേന ജില്ലയിലേക്ക് കഞ്ചാവ് കടത്തുന്ന സംഘങ്ങളെ കുറിച്ചും ഏജന്‍റുമാരെ കുറിച്ചും ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ നടത്തിയ പരിശോധനയിൽ ഇന്ന് രാവിലെ 10 മണിയോടെ കോട്ടക്കൽ ചങ്കുവെട്ടിയിൽ വെച്ചാണ് പ്രതികൾ പിടിയിലായത്. അവധിയെടുത്ത് നാട്ടിലേക്ക് പോകുന്ന തൊഴിലാളികൾ അവിടെ നിന്നും കുറഞ്ഞ വിലക്ക് കഞ്ചാവ് ശേഖരിച്ച് ജില്ലയിലെ ഏജൻ്റുമാർക്ക് കൈമാറുകയാണ് പതിവ്. ഇരുവരും നിർമ്മാണ തൊഴിലാളിയാണ്. സീനിയർ സിപിഒമാരായ വിശ്വനാഥൻ, ക്ലിൻ്റ് ഫെർണാണ്ടസ്, രജീഷ് സി, ഡാൻസാഫ് അംഗങ്ങളായ കെ ടി ആശിഫ് അലി, ടി.നിബിൻദാസ്, ജിയോ ജേക്കബ്, ദിനേശ് ഐ കെ, സലീം പി, ജസീർ കെ, എന്നിവരും ചേർന്നാണ് പ്രതികളെ പിടികൂടിയത്.