മുതിർന്ന മാധ്യമപ്രവർത്തകനും എഴുത്തുകാരനുമായ എസ് ജയചന്ദ്രന് നായര് അന്തരിച്ചു. 85 വയസായിരുന്നു. ബെംഗളൂരുവിലെ ആശുപത്രിയിലായിരുന്നു അന്ത്യം. സംസ്കാരം ഇന്നു രാത്രി ബെംഗളൂരുവില്. ഭാര്യ സരസ്വതിയമ്മ, മകള് ദീപ, മകന് ജയദീപ്. മലയാള മാഗസിന് ജേർണലിസത്തിന് പുത്തൻ മുഖം സമ്മാനിച്ച വ്യക്തിയായിരുന്നു അദ്ദേഹം.
ദീര്ഘകാലം കലാകൗമുദി വാരികയുടെ പത്രാധിപരായി പ്രവർത്തിച്ചു. സമകാലിക മലയാളം വാരികയുടെ സ്ഥാപക പത്രാധിപകരായിരുന്നു. ഒട്ടേറെ പുസ്തകങ്ങള് രചിച്ച അദ്ദേഹത്തിന്റെ ആത്മകഥയായ ‘എന്റെ പ്രദക്ഷിണ വഴികൾ’ക്ക് 2012ല് സാഹിത്യ അക്കാദമി പുരസ്കാരം ലഭിച്ചു. ഷാജി എന് കരുണ് സംവിധാനം ചെയ്ത പിറവി, സ്വം എന്നീ ചിത്രങ്ങളുടെ കഥ ജയചന്ദ്രന് നായരുടേതാണ്. ഈ ചിത്രങ്ങളുടെ നിര്മാണവും നിര്വഹിച്ചു.
റോസാദലങ്ങള്, പുഴകളും കടലും, അലകളില്ലാത്ത ആകാശം, വെയില്ത്തുണ്ടുകള്, ഉന്മാദത്തിന്റെ സൂര്യകാന്തികള് എന്നിവയാണ് പ്രധാന കൃതികള്. മുഖപ്രസംഗങ്ങള് സമാഹരിച്ച് പുസ്തകമാക്കിയിട്ടുണ്ട്.
തിരുവനന്തപുരം ജില്ലയിലെ ശ്രീവരാഹത്ത് ജനിച്ച ജയചന്ദ്രന് നായര് കെ ബാലകൃഷ്ണന്റെ പത്രാധിപത്യത്തില് പുറത്തിറങ്ങിയിരുന്ന കൗമുദി ദിനപത്രത്തിലൂടെയാണ് പത്രപ്രവര്ത്തനം ആരംഭിച്ചത്. മലയാളരാജ്യം, കേരള ജനത, കേരള കൗമുദി എന്നീ പത്രങ്ങളില് പ്രവര്ത്തിച്ചു. 1975ല് കലാകൗമുദി വാരികയില് സഹപത്രാധിപരും തുടര്ന്ന് പത്രാധിപരുമായി. 1997ല് ന്യൂ ഇന്ത്യന് എക്സ്പ്രസ് ഗ്രൂപ്പ് സമകാലിക മലയാളം വാരിക തുടങ്ങിയപ്പോള് പത്രാധിപരായി ചുമതലയേറ്റു. 2013 വരെ മലയാളം വാരികയില് പ്രവര്ത്തിച്ചു.
കെ ബാലകൃഷ്ണന് സ്മാരക പുരസ്കാരം, കെ സി സെബാസ്റ്റ്യന് അവാര്ഡ്, കെ വിജയാഘവന് അവാര്ഡ്, എം വി പൈലി ജേർണലിസം അവാര്ഡ്, സിഎച്ച് മുഹമ്മദ് കോയ പുരസ്കാരം എന്നിവ ലഭിച്ചിട്ടുണ്ട്. ‘കാഴ്ചയുടെ സത്യം’ എന്ന കൃതിക്ക് 2012ല് കേരള ചലച്ചിത്ര അക്കാദമി പുരസ്കാരം ലഭിച്ചു.
