എഷ്യയിലെ തന്നെ അതിസമ്പന്നനായ മുകേഷ് അംബാനിയുടെയും കുടുംബത്തിന്റെയും വിശേഷങ്ങൾ ദിവസവും വാർത്തകളിൽ ഇടംപിടിക്കാറുണ്ട്. മുകേഷ് അംബാനി തന്റെ വിശ്വസ്തർക്കും അടുത്ത ബന്ധുക്കൾക്കും നൽകിയ വിലപിടിച്ച സമ്മാനവും ശ്രദ്ധേയമാകാറുണ്ട്. അടുത്തിടെയാണ് മുകേഷ് അംബാനിയുടെയും നിത അംബാനിയുടെയും ഇളയ മകൻ അനന്ത് അംബാനിയുടെയും രാധിക മെർച്ചന്റിന്റെയും ആഡംബര വിവാഹം നടന്നത്. ഇളയമരുമകളെ കുടുംബത്തിലേക്ക് വരവേൽക്കാൻ അംബാനികൾ കോടികളാണ് ചെലവാക്കിയത്. ഇപ്പോഴിതാ നിത അംബാനി തന്റെ മൂത്ത മകനായ ആകാശ് അംബാനിയുടെ ഭാര്യ ശ്ലോക മേത്തയ്ക്ക് നൽകിയ സ്‌നേഹ സമ്മാനത്തിന്റെ വിശേഷങ്ങളാണ് പുറത്തുവന്നിട്ടുളളത്. 2019ലാണ് ആകാശും ശ്ലോകയും വിവാഹിതരായത്. 451 കോടി വിലമതിപ്പുളള ഡയമണ്ട് നെക്ലേസാണ് നിത അംബാനി, മൂത്തമരുമകൾക്ക് സമ്മാനിച്ചത്. പ്രശസ്ത ആഡംബര ആഭരണ ബ്രാൻഡായ മൗവാദിന്റെ നെക്ലേസാണ് സമ്മാനിച്ചത്. ഓരോ വിശേഷങ്ങൾക്കും അംബാനികൾ മരുമക്കൾക്ക് കോടികൾ വിലമതിപ്പുളള സാധനങ്ങളാണ് സമ്മാനിക്കുന്നത്. മരുമക്കളോടുളള മുകേഷ് അംബാനിയുടെയും നിത അംബാനിയുടെയും സ്നേഹവും സോഷ്യൽമീഡിയയിൽ ശ്രദ്ധേയമാണ്.
2022 ഏപ്രിലിൽ മുകേഷ് അംബാനി, അനന്തിനും രാധിക മെർച്ചന്റിനും ദുബായിലെ പാം ജുമൈറയിൽ 640 കോടി വിലമതിപ്പുളള ബിച്ച് ഫ്രണ്ട് വില്ല സമ്മാനിച്ചതും വാർത്തയായിരുന്നു. 3000 ചതുരശ്ര അടി വിസ്തീർണമുളള ആഡംബര വില്ലയിൽ പത്ത് മുറികളും, 70 മീറ്റർ അകലത്തിലുളള സ്വകാര്യ ബീച്ചും ഉണ്ടായിരുന്നു. അതുപോലെ 2007ൽ മുകേഷ് അംബാനി നിതയ്ക്ക് പിറന്നാൾ സമ്മാനമായി നൽകിയ പ്രൈവറ്റ് ജെറ്റും അതിശയിപ്പിച്ചു. 240 കോടി വിലമതിപ്പുളള എ319 എന്ന ജെറ്റാണ് സമ്മാനിച്ചത്. ഇതിൽ സകൈ ബാർ, മാസ്റ്റർ ബെഡ്റൂം, സ്റ്റ്‌ലൈറ്റ് ടെലിവിഷൻ. ഓഫീസ്, ഹൈടെക് ബാത്ത്റൂം തുടങ്ങിയ അത്യാധുനിക സൗകര്യങ്ങളും ഉണ്ടായിരുന്നു.
