ചങ്ങരംകുളം: കാണി ഫിലിം സൊസൈറ്റിയുടെ ആഭിമുഖ്യത്തിൽ സംഘടിപ്പിക്കുന്ന ‘കാണി-മാർച്ച്’ ചലച്ചിത്രോത്സവത്തിന് നവംബർ 13ന് ചങ്ങരംകുളത്ത് തുടക്കമാകും.നവംബർ 13 മുതൽ 15 വരെ ചങ്ങരംകുളം മാർച്ച് സിനിമാസിലാണ് ചലച്ചിത്രോത്സവം നടക്കുന്നത്.
മലയാള സിനിമ, ഇന്ത്യൻ സിനിമ, ലോകസിനിമാ വിഭാഗങ്ങളിലായി 12 ചിത്രങ്ങളാണ് മേളയിൽ പ്രദർശിപ്പിക്കുന്നത്.ദേശീയ അന്തർദേശീയ പുരസ്കാരങ്ങൾ നേടിയ ചിത്രങ്ങളും വിവിധ വിഭാഗങ്ങളിലായി പ്രദർശനത്തിനെത്തും. ലോക സിനിമയിലെ ശ്രദ്ധേയമായ ചിത്രങ്ങൾക്കൊപ്പം മലയാള സിനിമയിലെ മികച്ച സൃഷ്ടികളും മേളയുടെ ഭാഗമാകും.നവംബർ 13ന് വൈകിട്ട് അഞ്ചിന് നടക്കുന്ന ഉദ്ഘാടനച്ചടങ്ങിൽ സംവിധായകൻ മണിലാൽ ചലച്ചിത്രോത്സവം ഉദ്ഘാടനം ചെയ്യും.തുടർന്ന് സിനിമാ പ്രദർശനങ്ങളും നടക്കും.നവംബർ 14ന് ഫിലിം സൊസൈറ്റികൾ, ഫിലിം ഫെസ്റ്റിവലുകൾ എന്നീ വിഷയങ്ങളിൽ ഓപ്പൺ ഫോറം സംഘടിപ്പിക്കും. കെ.സി. നാരായണൻ ഉദ്ഘാടനം ചെയ്യുന്ന പരിപാടിയിൽ സിനിമാ രംഗത്തെ പ്രമുഖർ പങ്കെടുക്കും. ഹരി ആലങ്കോട്, നിഖിൽ പ്രദീപ് തുടങ്ങിയവരും ചർച്ചയിൽ പങ്കാളികളാകും.നവംബർ 15ന് നടക്കുന്ന സമാപന സമ്മേളനം സംവിധായകൻ ഉണ്ണികൃഷ്ണൻ ആവള ഉദ്ഘാടനം ചെയ്യും.സംവിധായകൻ രാമദാസ് കടവല്ലൂർ,കലാകാരൻ സിനിയ തുടങ്ങിയവർ പങ്കെടുക്കും.മേളയിലെ എല്ലാ ദിവസവും രാവിലെ 9.15ന് പ്രദർശനങ്ങൾ ആരംഭിക്കും.ചലച്ചിത്രാസ്വാദകർക്കും സിനിമാ പ്രേമികൾക്കും മികച്ച സിനിമകൾ പരിചയപ്പെടാനുള്ള അവസരമായിരിക്കും മേളയെന്ന് സംഘാടകർ അറിയിച്ചു.അടാട്ട് വാസുദേവന്‍,പിഎം കൃഷ്ണന്‍ നമ്പൂതിരി,ജബ്ബാര്‍ ആലംകോട്,സുരേഷ് കുമാര്‍ പിഎം,തുളസി കെപി,ശങ്കരനാരായണന്‍ പന്താവൂര്‍ തുടങ്ങിയവര്‍ വാര്‍ത്താസമ്മേളനത്തില്‍ പങ്കെടുത്തു
