ചങ്ങരംകുളം:ബസിനോടും യാത്രയോടുമുള്ള ഇഷ്ടം തന്നെ ജോലിയാക്കി മാറ്റി ശ്രദ്ധേയയായിരിക്കുകയാണ് 19-കാരിയായ വിദ്യാർത്ഥിനി. ചങ്ങരംകുളം – എടപ്പാൾ മേഖലയിൽ സർവീസ് നടത്തുന്ന ഫിദമോൾ എന്ന സ്വകാര്യ ബസിലെ കണ്ടക്ടറായ മൂക്കുതല സ്വദേശി അഗ്നിദയാണ് നാട്ടുകാർക്കും യാത്രക്കാർക്കും കൗതുകമാകുന്നത്.
ചങ്ങരംകുളം മൂക്കുതല സ്വദേശികളായ പ്രദാസ്-രമ്യ ദമ്പതികളുടെ ഏക മകളാണ് അഗ്നിദ. മൂക്കുതല ഹയർ സെക്കൻഡറി സ്കൂളിലായിരുന്നു ഹൈസ്കൂൾ പഠനം. ഇപ്പോൾ പൊന്നാനി എം.ഇ.എസ് കോളേജിൽ രണ്ടാം വർഷ ബി.ബി.എ വിദ്യാർത്ഥിനിയാണ്.
ചെറുപ്പം മുതലേ ബസുകളോട് തോന്നിയ ആകർഷണമാണ് കണ്ടക്ടർ ജോലിയിലേക്ക് എത്തിച്ചതെന്ന് അഗ്നിദ പറയുന്നു. പരിചയക്കാരനായ ഒരു ബസ് ജീവനക്കാരനോട് ആഗ്രഹം പങ്കുവെച്ചു. തുടർന്ന് ഫിദമോൾ ബസിന്റെ ഉടമയും ചാലിശ്ശേരി സ്വദേശിയുമായ ബാഹിർ പരിശീലനത്തിനും കണ്ടക്ടർ ലൈസൻസ് എടുക്കുന്നതിനുമുള്ള സൗകര്യങ്ങൾ ചെയ്തു നൽകി.
എടപ്പാൾ, ചങ്ങരംകുളം, പുത്തൻപള്ളി, ഉപ്പുങ്ങൽ കടവ്, പോത്തനൂർ മേഖലകളിൽ രാവിലെ 6.30 മുതൽ വൈകിട്ട് 7 വരെയാണ് ഫിദമോൾ ബസ് സർവീസ് നടത്തുന്നത്. ഒഴിവുദിവസങ്ങളിലാണ് അഗ്നിദ കണ്ടക്ടറായി ജോലിക്കെത്തുന്നത്.
പഠനത്തിലും കലാ-സാഹിത്യ മേഖലകളിലും തിളങ്ങിയ വിദ്യാർത്ഥിനി കൂടിയാണ് അഗ്നിദ. എട്ടാം ക്ലാസിൽ പഠിക്കുമ്പോൾ തന്നെ സ്വന്തമായി കഥയും തിരക്കഥയുമെഴുതി ഹ്രസ്വചിത്രം സംവിധാനം ചെയ്തു. മൂക്കുതല സ്കൂളിലെ എസ്.പി.സി ലീഡറായിരുന്നു. ശാസ്ത്രമേളയിൽ ജില്ലാതലത്തിൽ വേസ്റ്റ് മെറ്റീരിയൽ നിർമാണത്തിൽ ഒന്നാം സ്ഥാനവും നേടിയിട്ടുണ്ട്.
വീട്ടുകാരുടെ പിന്തുണ കൊണ്ടാണ് ആഗ്രഹിച്ച ജോലി ചെയ്യാൻ സാധിച്ചതെന്നും ബസ് ജീവനക്കാരിൽ നിന്നും യാത്രക്കാരിൽ നിന്നും മികച്ച പിന്തുണ ലഭിക്കുന്നുണ്ടെന്നും അഗ്നിദ പറഞ്ഞു. കൂടുതൽ പെൺകുട്ടികൾ ഈ മേഖലയിലേക്ക് കടന്നുവരണമെന്നാണ് ആഗ്രഹമെന്നും അഗ്നിദ കൂട്ടിച്ചേർത്തു.
ഫോട്ടോ ഫിദമോള് ബസ്സിലെ കണ്ടക്ടര് അഗ്നിദ
ഷാഫി ചങ്ങരംകുളം
