മാറഞ്ചേരി: അഴിമതി കേവലം ചില വ്യക്തികളുടെ മാത്രം പ്രശ്നമാണോ? അതോ സത്യസന്ധരായ വ്യക്തികൾക്ക് പോലും കാര്യക്ഷമമായി പ്രവർത്തിക്കാൻ കഴിയാത്തവിധം നമ്മുടെ ഭരണസംവിധാനത്തിലെ ചില ചട്ടങ്ങളും നടപടിക്രമങ്ങളും തടസ്സമായി നിൽക്കുന്നുണ്ടോ? ഈ ഗൗരവകരമായ വിഷയങ്ങൾ ചർച്ച ചെയ്യുന്നതിനായി തണൽ വെൽഫെയർ സൊസൈറ്റി മാറഞ്ചേരിയുടെ ആഭിമുഖ്യത്തിൽ ‘അഴിമതിയും സമൂഹവും: തിരുത്തേണ്ട ചട്ടങ്ങൾ’ എന്ന വിഷയത്തിൽ സംവാദം സംഘടിപ്പിക്കുന്നു.
നവംബർ 14 ശനിയാഴ്ച വൈകുന്നേരം 3 മണിക്ക് മാറഞ്ചേരി സൽക്കാര കമ്മ്യൂണിറ്റി ഹാളിലാണ് പരിപാടി നടക്കുന്നതെന്ന് ഭാരവാഹികൾ പത്രസമ്മേളനത്തിൽ പറഞ്ഞു.
അഴിമതിക്കാരായ വ്യക്തികളെ മാറ്റിനിർത്തുന്നതുകൊണ്ട് മാത്രം അഴിമതി അവസാനിക്കുമോ എന്ന ചോദ്യത്തോടൊപ്പം, അഴിമതിക്ക് സാഹചര്യമൊരുക്കുന്ന കാലഹരണപ്പെട്ട ചട്ടങ്ങൾ, സങ്കീർണമായ ഭരണനടപടികൾ, അനാവശ്യമായ കാലതാമസങ്ങൾ, അധികാരവിനിയോഗത്തിലെ അപാകതകൾ എന്നിവയും ചർച്ചയുടെ ഭാഗമാകും. ഭരണസംവിധാനത്തെ കൂടുതൽ സുതാര്യവും ഉത്തരവാദിത്തമുള്ളതും ജനസൗഹൃദവുമാക്കുന്നതിനുള്ള പരിഷ്കാരങ്ങളെക്കുറിച്ചുള്ള ആശയവിനിമയമാണ് സംവാദത്തിന്റെ ലക്ഷ്യം.
ചർച്ചയിൽ
ബഹുമാനപ്പെട്ട MLA കെ.പി. നൗഷാദലി, മീഡിയവൺ മാനേജിംഗ് എഡിറ്റർ സി. ദാവൂദ്, തനിമ കലാസാഹിത്യവേദി സംസ്ഥാന സമിതിയംഗം സുലൈമാൻ അസ്ഹരി, ഫ്രണ്ട്ലൈൻ ലോജിസ്റ്റിക് ഗ്രൂപ്പ് എം.ഡി. ബി.പി. നാസർ, തണൽ പ്രസിഡന്റ് പി.പി. നാസർ, സാമൂഹ്യ പ്രവർത്തകൻ കാട്ടിൽ മുഹമ്മദ് കുട്ടി, എഴുത്തുകാരൻ ഏ. ടി. അലി, തുടങ്ങിയവർ പങ്കെടുക്കും.
ഇതോടൊപ്പം എഴുത്തുകാരനും മുൻ ഗവൺമെന്റ് അഡീഷണൽ സെക്രട്ടറിയുമായ അബ്ദുൽ ലത്തീഫ് മാറഞ്ചേരിയുടെ അനുഭവസമ്പന്നമായ സർവീസ് സ്റ്റോറിയായ ‘നീളെ തുഴഞ്ഞ ദൂരങ്ങൾ’ എന്ന പുസ്തകത്തിന്റെ നാലാം പതിപ്പ് പ്രകാശനവും നടക്കും. കെ.പി. നൗഷാദലി എം.എൽ.എ പുസ്തകം പ്രകാശനം ചെയ്യും. ഫ്രണ്ട്ലൈൻ ലോജിസ്റ്റിക് ഗ്രൂപ്പ് എം.ഡി. ബി.പി. നാസർ പുസ്തകം ഏറ്റുവാങ്ങും. സുലൈമാൻ അശ്ഹരി പുസ്തകപരിചയം നടത്തും.
ഔദ്യോഗിക ജീവിതത്തിലെ അനുഭവങ്ങളിലൂടെ ഭരണസംവിധാനത്തിന്റെ വിവിധ തലങ്ങളെയും അതിന്റെ പരിമിതികളെയും പൊതുസമൂഹത്തിന് മുന്നിൽ അവതരിപ്പിക്കുന്ന പുസ്തകമാണിത്. അഴിമതിയെക്കുറിച്ചുള്ള പതിവ് വിമർശനങ്ങൾക്കപ്പുറം, അഴിമതിക്ക് വഴിയൊരുക്കുന്ന വ്യവസ്ഥിതികളിലും ചട്ടങ്ങളിലും മാറ്റം വരുത്തേണ്ടതിന്റെ ആവശ്യകതയിലേക്കാണ് പുസ്തകത്തിലെ ചില അധ്യായങ്ങൾ ശ്രദ്ധ ക്ഷണിക്കുന്നത്.വാര്‍ത്താസമ്മേളനത്തിൽ തണൽ സെക്രട്ടറി എ. അബ്ദുൾ ലത്തീഫ് ,എക്സിക്യൂട്ടീവ് അംഗങ്ങളായ എ. മൻസൂർ,റമീനാ ഫാരിഷ്, കാർത്തിക നിധീഷ്, ആരിഫാ ബഷീർ എന്നിവർ പങ്കെടുത്തു.
