എടപ്പാൾ പൂരാടം വാണിഭത്തിൽ ശ്രദ്ധേയമായി ചുണ്ടൻ വള്ളം’വിഎസ് ജോയ് ഉദ്ഘാടനം ചെയ്തു

എടപ്പാൾ: കേരള പരസ്യകലാസമിതി സംസ്ഥാന കമ്മിറ്റിയുടെയും എടപ്പാൾ യൂണിറ്റിന്റെയും സംയുക്താഭിമുഖ്യത്തിൽ എടപ്പാൾ പൂരാടം വാണിഭത്തിന്റെ ഭാഗമായി ഒരുക്കിയ ചുണ്ടൻ വള്ളം ശ്രദ്ധേയമായി.പതിനെട്ടിലധികം കലാകാരൻമാർ ദിവസങ്ങളോളം പരിശ്രമിച്ചാണ് ചുണ്ടൻ വള്ളത്തിന്റെ നിർമ്മാണം പൂർത്തിയാക്കിയത്.പുരാണ വാണിഭത്തിൽ ഒരുക്കിയ ചുണ്ടൻ വള്ളത്തിന്റെ പ്രദർശനോദ്ഘാടനം തവനൂർ എം.എൽ.എ. വി.എസ്. ജോയി നിർവഹിച്ചു.പരസ്യകലാസമിതി സംസ്ഥാന കമ്മിറ്റി അംഗം ശശി എടപ്പാൾ സ്വാഗതം പറഞ്ഞു.കലാകാരൻ പ്രദീപ് പാറപ്പുറം അധ്യക്ഷത വഹിച്ചു.ചുണ്ടൻ വള്ളത്തിൽ ഭീമൻ കായക്കുലകളും മത്തനും ഒരുക്കിയിട്ടുണ്ട്.ഇതോടൊപ്പം ഓണസദ്യയുടെ നിശ്ചലചിത്രവും ഒരുക്കിയിട്ടുണ്ട്.വള്ളം നിർമ്മാണത്തിൽ പങ്കെടുത്ത കലാകാരൻമാരായ ഉദയൻ എടപ്പാൾ ഉൾപ്പെടെ 18 പേരുടെ പേരുകളും ചിത്രങ്ങളും ഉൾപ്പെടുത്തിയ ബോർഡും സ്ഥാപിച്ചിട്ടുണ്ട്.സഹപ്രവർത്തകരായ അറുമുഖൻ, അനഘ, ധനജയൻ എന്നിവരുടെ സ്മരണകളും ബോർഡിൽ രേഖപ്പെടുത്തിയിട്ടുണ്ട്.ചടങ്ങിൽ എടപ്പാൾ ഗ്രാമപഞ്ചായത്ത് പ്രസിഡന്റ് കെ.പി. സിന്ധു, ബ്ലോക്ക് പഞ്ചായത്ത് പ്രസിഡന്റ് അഡ്വ. ഗായത്രി, എടപ്പാൾ ഗ്രാമപഞ്ചായത്ത് അംഗം മുഹമ്മദ് ലൈസ്, ചുണ്ടൻ വള്ളത്തിന്റെ പ്രധാന ശിൽപ്പികളിലൊരാളായ ഉദയൻ എടപ്പാൾ, പരസ്യകലാസമിതി സംസ്ഥാന കമ്മിറ്റി അംഗങ്ങളായ ജബ്ബാർ,ബുഷറ,പ്രേമദാസ് നിറം, ശ്രീജേഷ് റെഡ്, ബാലൻ എടപ്പാൾ, സജീർ ക്രിയേറ്റീവ്, ഉഷാദ്, മോഹനൻ, റഷീദ് പാവിട്ടപ്പുറം, ജലീൽ കെ.സി., സുരാജ് ബാബു തുടങ്ങിയവർ പങ്കെടുത്തു.കഴിഞ്ഞ വർഷങ്ങളിലും പരസ്യകലാസമിതിയുടെ നേതൃത്വത്തിൽ പൂവട്ടി, കാഴ്ചക്കുല തുടങ്ങിയ വിവിധ രൂപങ്ങൾ ഒരുക്കിയിരുന്നു.ചുണ്ടൻ വള്ളത്തോടൊപ്പം സെൽഫിയെടുക്കാനും ചിത്രങ്ങൾ പകർത്താനുമായി നിരവധി പേരാണ് ദിവസവും എത്തുന്നത്.ഓണാഘോഷ പരിപാടികൾക്ക് ശേഷം ചുണ്ടൻ വള്ളം വാണിഭവേദിയിൽ നിന്ന് മാറ്റും.ചുണ്ടൻ വള്ളത്തിന്റെ നിർമ്മാണത്തിൽ പങ്കെടുത്ത മുഴുവൻ കലാകാരൻമാരെയും എടപ്പാൾ പഞ്ചായത്തിന്റെ പൂരാടം വാണിഭ സാംസ്കാരിക സമ്മേളനത്തിൽ ആദരിച്ചു.